Barato ra uy

Daghan ang nakapanglingo-lingo sa pahibawo sa Metro Cebu Water District (MCWD) nga karong sunod semana mopa-increase sila sa presyo sa gisuplay nilang tubig nga ibase sa magamit sa mga konsumedor.

Kon ang konsumo nga tubig sa usa ka buwan dili molapas sa 10 cubic meters (50 ka baril) ang usbaw sa bayranan niini, kapin ra sa P23.00. Mas dako og usbaw kon daghan ang tubig nga magamit sa usa ka buwan.

Para nako, wa gyud ko mahadlok nga nga usbawan sa MCWD ang ilang water rate, kay barato ra man gihapon. Ang uban gud, nabatasan na man nila nga basta naa gani increase, moreklamo gyud dayon.

Wa ba mo masayod nga ang mga nagpuyo sa upland areas, bisan og dili mga kwartahan, mobayad man gani og tag P100 ang sa usa ka baril nga tubig?

Dili man sab mahimo nga magpabilin na lang sab ang barato kaayong presyo sa tubig sa MCWD kay unsaon man nila sa pagbawi sa ilang mga gastohan?

Ang labing mahinungdanon mao nga duna ta’y tubig nga magamit kay mag-unsa man nang imong kuwarta kon wa kay tubig nga moagas sa imong gripo?

Kon magsige lang ang barato nga presyo sa tubig, moabot ang higayon nga mabangkarota ang panudlanan sa MCWD ug manirado na lang, ug anha dihang higayona nga kining bagolbohan makasabot na sa tinuod nga isyu.

* * *

Ang uban bitaw mihimo’g isyu nga mahal kuno kaayo ang prisyo sa tubig nga gipalit sa MCWD gikan sa private suppliers. Ang uban tag P85 ang cubic liters, ilabi na kanang desalinated water, nga ang tubig nga parat gihimong tab-ang.

Sa akong pagpaniid, ang tubig gikan sa JE Hydro & Bio-Energy Corporation nga maoy supplier ug tubig gikan sa Barangay Lusaran, mao ra’y labing barato kay tag P65 ra ang cuvic meter.

Sa ato pa, kay lima man ka baril ang usa ka cubic meter, nagpasabot nga ang tubig nga gi-supply sa JE Hydro tag P12 ra ang baril. Kabarato niana nga kantidad?

Sa ako na nga giingon, nga kaniadtong 2008 nga wa pa ko’y linya sa MCWD, dako kaayo ko’g gasto kay magpalit ko og tubig nga tag P50 ang baril gikan sa mga mag-deliver og tubig.

Kanang panahon sa huwaw kun El Niñ0, tag P100 gyud ang baril kay ang P500 man ang kanang square nga platic nga kuno usa ka cubic ang sulod, bisan og ang tinuod 4.5 cubic ra na.

Busa, kamong mga kusog kaayong moreklamo, maoy hunahunaa ninyo nga dili mahal ang gipangayong bayad sa MCWD nga dugang P23 alang sa minimum water consumers.