Suspension sa klase

Nabahin ang baruganan sa publiko kabahin sa polisiya sa gobiyerno pagsuspenso sa klase mataghigayon nga dunay kusog nga uwan nga posibling moresulta sa mga pagbaha ug pagdahili sa yuta.

Ang katuyoan sa maong polisiya mao nga aron malikay ang mga tinun-an sa piligro nga mahiaguman kun dunay baha o pagdahili sa yuta. Dunay daghang miingon nga ang nahitabong pagsuspenso sa klase niadtong Martes bisan way bagyo wala kinahanglana.  Gihisgutan sa mga wala makauyon sa pagsuspenso sa klase ang ilang personal nga mga kasinatian kaniadto.

Sigun nila nga bisan magbunok ang uwan ug magbaktas og tagpila ka kilometro nga magtiniil ug magpandong lang og dahon sa saging o ba kaha dahon sa badiang, moadto gyud sila sa eskwelahan aron motungha. Apan karon bisan nagdag-om palang daghan na ang mangutana og wa bay suspension sa klase.

Ang mga uyon sa lagda nangatarungan pud nga lahi na ang panahon kaniadto ug karon. Kaniadto bisan magbunok ang uwan way lunop sa syudad, apan karon bisan dyutay’ng taligsik dunay mga dapit nga taga tuhod na ang tubig. Alang sa mga uyon sa pagsuspenso sa klase, mas importante ang seguridad sa kabataan.

Tinuod nga dako na ang kalainan sa panahon kaniadto ug karon. Apan way nausab sa kadako sa importansiya sa edukasyon. Apan subo nga palandungon nga sa panahon sa kabag-ohan daw wala hatagi og gibug-aton sa sa uban ang kabililhon sa edukasyon.

Makita ni sa mga resulta sa mga national ug international nga pasulit pagsukod sa kahibawo sa atong mga tinun-an. Ang report sa Education Committee sa Kongreso niining bag-ohay lang makapanlimbawot sa balhibo ang resulta nga nagpakita nga moabot og 70 porsiento sa mga tinun-an way reading comprehension o dili kasabot sa ilang gibasa.

Daghan ang factors nganong ingon niini ang resulta ug usa niini mao nga kanunay’ng masakripisyo ang klase sa mga tinun-an tungod sa kahimtang sa panahon. Kun dunay uwan bisan way bagyo suspensohon ang klase.

Kun labihan ka init sunpensohon sab ang klase. Kun dunay mga kalihukan sama sa ASEAN suspensohon ang klase tungod sa siguridad sa mga bisita.

Kun dunay kalamidad sama sa sunog suspensohon ang klase tungod kay ang tunghaan gigamit isip evacuation center. Sa bisan unsang hitabo kanunay ang pagtuon maoy masakripisyo.

Samtang dili dautan ang pagsuspenso kun gikinahanglan gyud alang sa siguridad, apan maayo tingali nga dili wholesale ang suspension. Kadto lang mga dapit  nga piligroso gyud ang isuspenso ug dili iapil ang ubang tunghaan nga luwas ra alang sa mga tinun-an.