Klarong sabotahe
Kon tinuod nga walay pagtugot ni Tourism Secretary Christina Garcia Frasco ang pagplastar sa iyang dagway sa kaliboan ka tarps, banners, streamers, brochures ug ubang printed ug online materials sa Department of Tourism sa tibuok nasud, mahimo ba nga iyang ipa-imbestigar aron mailhan, mapasakaan og mga kaso, mapahamtangan og tukmang silot ug pabayron sa nausik nga minilyon ka pesos nga buhis sa katawhan sa buot-buot ra diay nga kampanya?
Hinaut nga interesado siyang mahibawo kinsa ang mga nagsabotahe sa iyang liderato aron pagseguro nga ma-iwit ang Pilipinas sa turismo.
* * *
Mahimong sugdan niya sa klarong binuang nga pagputos sa mga produkto sa Titay’s nga gipapilitan pa sa letrato niya ug sa iyang bana isip opisyal nga gasa sa iyang upisina ngadto sa iyang kaubang tourism ministers sa Association of Southeast Asian Nations.
Lisod tuohan nga siya ang nagsugo sa maong tinonto. Naa gyod tingali mga ahente sa kangitngit nga nakasulod sa iyang upisina. Kansang tuyo mao ang paglawog niya sa pasangil sa pag-promote sa negosyo sa iyang ugangan. Ug sa atraso nga wala gyod sa iyang bokabularyo–ang pagka-epal.
* * *
Angay’ng magpatabang sa National Bureau of Investigation, nga nagpagamit sa iyang inahan paghasi nilang Gobernador Pam Baricuatro, anhing Dr. Rowena Burden ug ubang mga kaatbang, aron mailhan kinsay nisal-ot sa hair, makeup ug photoshoot sessions sa busy niyang schedule.
Klarong dunay mga mangtas nga staff nga niiban sa iyang mga oras pagplano, pagpangonsulta ug pagpatuman sa mga programa pagpalambo sa turismo pinaagi sa pag-insistir nga mas daghan ang mga letrato ug video sa iyang nawong kay sa tourist destinations.
* * *
Kon may panahon pa, sa dili pa mailad ang Malakanyang sa mga intriga pagpalagpot niya sa puwesto, mas maayong imbestigahon kinsay mga malisyuso nga klarong wala mananghid nibutang sa iyang dagway sa senior citizen’s IDs ug sa kada ang-ang sa hagdanan sa munisipyo niadtong mayor pa sa Liloan.
Dako ang kahigayonan nga naa pa sa puwesto ang mga responsable. Kay nalipat sab nila si Duke nga nag-una pagka mayor niya ug si Aljew nga nisunod niya. Wala hinuon silay dagway sa hagdanan pero gibawi sa kadaghan sa tarps sa tanang poste. Nga labing seguro wala say pagtugot gikan nila.
* * *
- Latest
