Narciso ug Narcisa
Iyang aksiyon mas lanog kay sa iyang tingog. Tanan niyang panghimakak nasapawan sa iyang gihimo. Naigo sa paukyab sa iyang kaugalingong inahan, kinsa mao ray makaribal niya sa pagka mapugsanon sa pagbutang sa ilang mga nawong sa tanang poste, nga buhat maoy pasultihon.
Puwerteng pangugat ni Tourism Secretary Christina Garcia Frasco pagsalikway sa mga tulisok nga mas gi-promote ang iyang dagway kay sa tourist destinations. Pero sobra pa sa gidasonan ang pasangil. Gisugo ang iyang regional offices sa pagpatangtang sa tanang tarps ug billboards sa iyang dagway sa tibuok nasud.
* * *
Nganong lisod man parang Frasco ang pag-angkon nga nasobrahang iyang ka-epal? Nibawos ba lang ni Senador Raffy Tulfo nga nisaway sa iyang inahan, Gwen Garcia, sa kahugaw sa bus terminals sa Sugbo dayong eleksiyon sa niaging tuig?
Nganong imbes mosaad nga menosan ang photoshoots (bisan dili tumanon) nipalusot man nga daghan ang iyang mga letrato kay nagkugi sa pagpangulo sa kalihokan sa turismo? Nganong imbes dasonan ang maayong mga rekomendasyon ni Tulfo, nisumbalik man hinuon nga mao bay gusto sa senador nga dili na siya moduaw sa mga rehiyon?
* * *
Masabtan ang paugat ni Frasco sa mga pagtuon sa psychology nganong lisod sa narcissists pag-angkon sa sayop ug pagpangayo og pasaylo:
Gibakakan ang ilang kaugalingon nga silay labing maayo ug kanunayng sakto, maong ang pag-angkon sa sayop makaguba sa ilusyon ug makahatag og dakong kauwawan;
Gipalabi ang ilang interes maong dili makabatyag sa kasakit sa uban nga ilang nayatakan;
Ilang mga relasyon gipasikad sa panginahanglan sa pagkontrolar dili sa koneksiyon, maong dili mosugot nga mabentahaan kay giisip nang simbolo sa kahuyang; ug
Kon mapugos pagpangayo og pasaylo pakapinan og pagbasol sa ubang mga tawo nga maoy sad-an.
* * *
Base sa pagtuon sa ibabaw, mas masabtan na nganong:
Gibutangan ni Christina sa iyang mga letrato ang mga ang-ang sa hagdanan sa munisipyo sa Liloan sa siya pay mayor;
Wala pa moangkon silang Gwen ug Mike Rama sa ilang kapildehan sa eleksiyon; ug
Namugos si Gwen pagsayaw sa Sinulog (kay kumbinsidong magmingaw ang piyesta kon dili mosalida ang kinamaayohang mananayaw) ug si Rama sa pagkanta sa tanang programa (kay nagtuong walay makapugong sa pagpakpak kon makabati sa iyang tingog).
* * *
- Latest
