Ultimatum sa MCWD
Taas og lahutay ang mga sakop sa Board of Directors (BOD) sa Metro Cebu Water District (MCWD) nga gipasanginlang mga sakop ni kanhi Presidential Assistant Mike Dino:
Nalutsan ang pagkuwestiyon sa legalidad sa pagtudlo ni anhing Cebu City Mayor Edgar Labella nila niadtong 2019;
Naabtikan si kanhi Mayor Mike Rama nga nisuway sa pagtaktak nila ug pagtudlo og bag-ong mga sakop sa BOD; ug
Padayon silang nidominar sa MCWD bisan nidaog si Mayor Nestor Archival kinsa ilang giisnab dihang isip konsehal nangayo sa mga dokumento sa gikuwestiyon nilang mga transaksiyon.
* * *
Mahimong natapos nang malipayon nilang mga adlaw. Human gitudlo ni Archival nga mga sakop sa BOD silang kanhi MCWD Chairperson Ruben Almendras ug Atty. Mariefel Resma Roble ug nibalik si Atty. Earl Bonachita. Bag-o na ang mayoriya sa BOD. Mahimo na nilang tangtangon silang MCWD Chair Miguelito Pato ug Board Secretary Jodelyn May Seno pinaagi sa eleksiyon sa sunod nilang tigom.
Human sa pito ka tuig, mahimong maputol nang gidudahang mga binuang sa MCWD. Nga gipasangil sa mga kanhi tagdumala nga gipangulohan ni kanhi MCWD Chairperson Joey Daluz.
* * *
Hinaot nga dili pa uwahi ang tanan. Human subayang mga transaksiyon, nahugno si Almendras sa kadako sa ilang alkanse sa niaging siyam na ka tuig. Nga nagtuo siyang gitagoan pinaagi sa pagmaniobra sa financial statements.
Duha ka sulbad ang nahunahunaan ni Almendras: Pagkumbinser sa Local Water Utilities Administration (LWUA) pag-aprobar sa aplikasyon sa MCWD pagpa-uminto sa bayranan sa mga konsumidor; ug pagpangutang og P500 milyones gikan sa LWUA ug Development Bank of the Philippines.
* * *
Ambot duna pa bay igong panahon. Nihulga nang Mactan Rock Industries ug ubang bulk water suppliers sa pagputol sa ilang suplay sa MCWD kay wala mabayri ang minilyon ka pesos nga utang sa nangaging katuigan. Gipasanginlan nilang mga opisyal sa MCWD nga nagapa-ugat bisan gibalik-balikan na og paningil.
Ang MCWD morang tubod kuwarta. Kada adlaw, bisan sa kabati sa ilang serbisyo, nga mas daghang oras nga pawong kay sa agas ang mga gripo sa ilang mga pinuy-anan, nga kinahanglang magtukaw aron makasawod sa hinay kaayong agas sa kadlawong dako, maglinya ang mga konsumidor aron sa pagbayad. Nganong alkanse man?
* * *
- Latest
