Pork sa Kapitolyo
Dili kapugong ang mga politiko sa ilang kaugalingon. Bisan sa daghang mga balaod nga nagdili nila, ang mga kongresista, mga senador, mga mayor ug mga gobernador mao lang gihapoy magbuot kinsay hatagan, pilay ihatag ug kanus-a ihatag ang binilyona ka pesos nga mga ayuda nga nasukip sa 2026 budget.
Sama sa naandan ang implementing agencies inutil sa pagbadlong nila. Kay nahibawo nga mga kongresista ug mga senador maoy magbuot sa ilang budget sunod tuig ug ang mga mayor ug mga gobernador dako og tingog duna pa ba silay trabaho ugma.
* * *
Makiangayon ang mga protesta batok nilang Presidente Ferdinand Marcos Jr. ug sa liderato sa Kongreso nga nibudhi sa ilang saad nga ang 2026 budget maoy kinalimpiyohan sa kasaysayan.
Angayng dasigon ang mga grupong mokuwestiyon sa legalidad sa pork barrel sa budget atubangan sa Korte Suprema. Angayng hangpon ang mga negosyante nga niawhag ni Marcos Jr. pagpalig-on sa iyang mga pasalig pinaagi sa paghimo og executive order.
* * *
Maong dili angayng palabyon ang pagpaburot sa mga sakop sa Cebu Provincial Board sa ilang kaugalingong pork barrel. Niinsistir silang Bise Gobernador Glenn Soco ug kaubanan nga silay magbuot kinsay makapahimulos sa scholarship program sa Kapitolyo nga mohatag og P10 mil kada semestre kada estudyante sa state colleges and universities.
Gi-ulog-ulogan nila si Gobernador Pam Baricuatro pinaagi sa paghatag niya sa kinadaghanan nga 2,500 scholarship slots. Aron dili barawon sa iyang administrasyon ang 1,000 slots ni Soco, 200 slots sa kada board member ug 100 slots sa kada ex-officio member.
* * *
Nagkinahanglan sa tanang tabang ang labing kabos nga mga estudyante aron makatiwas og kurso. Pero nganong kinahanglan mang mo-amen, moluhod, o mosipsip sa mga politiko aron makapahimulos sa benepisyo nga gihatag na sa balaod nila?
Mas makiangayon kon itugyan ang programa ngadto sa tinuod nga makamao sa pagtakda sa makiangayon nga mga panginahanglan. Pagseguro nga ang labing takos ug labing nagkinahanglan maoy matabangan. Ug dili mag-agad maayo ba og buot ang mga politiko sa pag-apud-apod sa hinabang. Nga sama sa naandan maniobrahon aron ma-utangan og kabubut-on ang mga Sugbuanon nila. Dili nato tugotan nga ang katungod sa edukasyon panamastamasan nila ug himuong makauuwaw nga pakilimos.
* * *
- Latest
