Gutom ug uhaw

Padayon kining gibati karon sa mga tawo nga naapektohan sa katalagman nga bag-o lang nahiaguman sa katawhan.

Usa ka bata ang akong nahimamat didto sa lungsod sa Liloan nagtulo intawon ang iyang luha dili lang sa kagutom kon dili sa iyang kauwaw ug kahiubos dihang naglinya siya aron mangayo og pagkaon apan gibalibaran siya sa incharge kay dunay lista nga gisunod ug gikinahanglan usab nga ang ginikanan sa bata ang mokuha sa pagkaon.

Naestorya nako ang iyang inahan ug mipasabot nga iyang gisugo ang iyang anak pagpangayo bisan usa lang ka pack meal kay dili bali na og dili siya makakaon basta ang importante ang iyang anak nga 10 anyos.

Nakasabot kita nga dunay protocol sa pagpanghatag og ayuda apil na ang pagkain kay kabahin kini sa proseso nga ilang gitamdan aron mas han-ay ang flow sa distribution.

Pero usahay pwede seguro og mohatag og humanitarian consideration kon makita nila nga vulnerable sama sa usa ka bato ang mihangyo og usa ka pack meal apan wala gyud mohumok ang kasing kasing sa incharge. Igo nalang kita sa pagsimpatiya sa kasinatian sa bata.

Laing nabantayan nako ang traditional nga pag-handle sa ayuda o pagkaon gihapon nga kadto lang sa naa sa evacuation center ang mabuhong sa paghatag kay naa sa listahan ug kadtong wala didto luoy intawon kaayo. Samtang manghinubra usahay ang mga pagkaon kay didto man nila irefer ang gustong mo donate ang uban intawon sa gawas naglaway ug gipanggutom. Nasaksihan nako ang kadismaya sa mga hingtungdan.

Matud sa uban ngano bitaw nga mga gahig ulo dihang gipaadto sa evacuation center wala gyud motuo ug dihang nasuta nila nga dili niya kaya ang hitabo magsige na dayon og demand, pa-victim dayon.

Ang mga sinaligan sa evacuation center ang mga kontrabida kay dili naman sila ang mahatagan og prioridad.

Ok ra man unta kining systemaha kay aron dili hasol ug dili usab magka gubot pero dunay angayan usbon ani nga patakaran ilabi na kong ang sitwasyon wala na kay kapilian.

Pangutana sa mga tawo nga wala sa evacuation center nga sila na gani ang hapit nakalas kay nagpabilin sila sa atop sa ilang mga pinuy-anan apan sila ang dili mahatagan og pagtagad dili mahatagan og pagkaon kay lagi wala sila sa listahan.

Ang kadtong naa sa evacuation center medyo hayahay kuno ang kahimtang kay safety ra ug less stress ug ini’g human sa bagyo matagad dayon.

Unta ang actual nga naapektohan sa katalagman ang adtoon mga awtoridad  kadtong wala na ang mga balay kay gianod na sa baha.

Kong hatagan og pagtagad ang mga naa na daan sa evacuation center, angayan tagdon usab ang kadtong naa sa gawas kay walay gipili ang gutom ug ang uhaw kong asa na nahimutang.

Asa man ang palabihon ang naandan nga proseso o ang makatawhanon nga pagtratar sa mga tawo nga gipang gutom nasama sa bata nga akong nahimamat nga nahikawan intawon sa gipangayo nga pagkaon nga itambal niya sa kagutom.