EDITORYAL - Mga tikasang gasolinahan

Daghang nalipay kagahapong adlawa ilabi na mga motorista tungod sa kadako sa pagkubos sa presyo sa lana ilabi na ang gasoline nga niabot og P16 kada litro ang pagkubos.

Pero naay mga gasolinahan nga wala motuman sa gitakda sa Department of Energy nga P16 sa gasolina, P4 sa diesel ug P3.70 sa kerosene nga us-os sa presyo sugod kagahapon, Nobiyembre 10.

Matud pa nga naay mga gasolinahan nga P12 kada litro sa gasolina ra ang gius-os sa ilang presyo. 

Kung kinsa man ning mga gasolinahan nga tikasan, angay silang ilhon ug angay sab pamultahon subay sa balaod.

Dili gyud mawala kaning mga tikasan ug hangol sa kwarta nga mga tagiya og gasolinahan. Mamintaha gyud pirme kung dili mabantayan.

Ang DOE namahahayag nga padad-an  nila og show cause orders ang mga gasolinahan nga wala mosanong sa hustong presyo sa maong rollback.