Ang Tawag sa Pagka Sulugoon

Basaha: Lk. 17;7-10

Ang usa ka sulugoon wala paabotanga molabaw sa iyang agalon.

Ang usa ka sulugoon motuman lamang kun unsay mando sa iyang agalon.

Kini tungod kay ang agalon mao man ang tag-iya kaniya ug maoy magbuot kaniya bisan gani sa iyang ugma ug kinabuhi ingon sulugoon sa usa ka agalon.

Kining matanga sa panghunahuna ang angayan natong batonan isip mga tinun-an sa atong Diosnong Magtutudlo.

Human nato mahimo ang bisan unsang maayo ug makatabang sa uban ato kining pagaisipon nga pagtuman lamang sa kamandoan sa atongGinoo ug dili sa atong kaugalingong pasidungog.

Kun ato kining matuman matuod gayud nga atong gihigugma ang atong Ginoo nga nianhi aron moalagad ug dili aron alagaran.

Ning paagiha mamahimo kitang iyang mga tinun-an ug higala sanglit ato mang gihigugma ang magtutudlo ug agalon nato nga tungod niini atong gituman ang iyang kamandoan nga kun kinsa kadtong buot nga mamahimong labaw sa tanan kinahanglang mamahimong alagad ug sulugoon alang sa tanan.