Dakoa sa problema

Nakasinati karon og problema sa tubig ang mga lumolupyo sa bukirang mga barangay sa Cebu City nga nagsalig sa gisuplay nga tubig sa MCWD nga gikan sa JE Hydro & Bio-Energy Corporation.

Kada adlaw, ang JE Hydro mo-supply unta og 30 million liters nga tubig (30,000 cubic meters) ngadto sa MCWD nga gikuha nila gikan sa Barangay Lusaran, usa ka barangay sa bukid 30 kilometros gikan sa Busay.

Apan sukad nga miigo ang Bagyong Tino nga nakamugna og kusog kaayong uwan, wa na makaserbisyo ang JE Hydro kay gipawong man sa Visayan Electric ang ilang mga generator sets. Gikontak nako si Engr. Art Gotardo nga maoy operations manager sa JE Hydro kay hangtud karon wa man mobalik pag-agas ang mga gripo sa nagpuyo sa bukirang barangay.

Ang rason diay nga wa na makabalik og andar ang mga generator sa JE Hydro kay daku kaayo ang kadaot nga nahiagoman sa ilang mga electrical equipment nga gisanapan sa tubig pagsuyla sa sapa sa Lusaran.

Dili maayong paandaron dayon pagbalik ang maong mga electrical equipment kay kinahanglan pa kini nga limpyohan unya paughon, aron dili makamugna og short electrical circuit.

Gawas niana, duna pay kabahin sa daku kaayong tubog sa JE Hydro nga gikutay palabang sa sapa, ang nabali tungod sa pag-apaw sa tubig- baha. Ang nakapasabot sa problema kay ang mga trabahador sa JE Hydro miuna pag-atiman sa nangaguba nilang kabalayan.

Tungod niining maong problema, daghan ang masakripisyo, og wa masayod kon asa kini mokuha og tubig nga magamit sa inadlaw-adlaw nga kagamitan sa panimalay.

Ang ubang mga dapit sa lupa nga bahin sa Cebu City nakasinati gani og kakuwang sa suplay, tungod kay naibanan man ang pundo sa MCWD nga makuha unta nila gikan sa JE Hydro.

Wa pa masayod si Engr. Gotardo kon kanus-a sila makabalik sa pagserbisyo. Ang ubang mga tinubdan sa tubig sa MCWD, nakabalik na sa pag-andar.

* * *

Pwerteng dakoa gyud sa kahasol ang nahimo niadtong Bagyong Tino. Mga tag-iya og daghang sakyanan nakahilak kay gilutaw ug gianod ang ilang mga sakyanan tungod sa kusog nga baha sa kasapaan.

Lisud toohan nga ang daku ug lawom nga sapa nga kabahin sa Butuanon River didto sa Barangay Bacayan, misuyla ang tubig ug milunop sa kabalayan.

Sayonan ka nga dunay mga duha ka andana nga building atol na lang ang migimaw, ug ang uban sa mga lumolupyo didto na nagpatong nga nagpaabot nga dunay moluwas kanila? Nakasiguro ko nga ang Bagyong Tino, bisan hinay ra ang hangin niadto, apan usa kini sa mga bagyo nga dili makalimtan.