Hinaut andam

Gitagna nga usa sa labing isog ang umaabot nga El Niño phenomenon nga mosakdap sa Pilipinas ug ubang kanasuran sa Pasipiko sugod ning bulana hangtod sa tungatungang bahin sa sunod tuig.

Matud sa Philippine Atmospheric, Geophysical and Astronomical Services Administration, usa ka "very strong" El Niño ang moigo sa nasud nga angay pangandaman sa katawhan.

Gani, matud sa report sa Climate Impact Lab sa University of Chicago nga ang ("super") El Niño mahimong  maka-contribute og 451,000 heat-related deaths sa kalibotan gikan sa June 2026 hangtud sa February 2027.

Matud pa nga ang "451,000 figure refers only to deaths associated with extreme heat. It does not include deaths from drought, crop failures, food shortages, wildfires, floods, disease outbreaks, or other secondary effects of El Niño."

Ambot kon unsa ka andam ang atong kagamhanan ug mismo ang katawhang Pilipinhon sa hulga sa umaabot nga dakong hulaw. Sa akong pagsulat nini, wala ko makadungog og mga  konkretong programa nga gitagana batok sa maong kalamidad.

Hinuon adunay mga panawagan gikan sa mga hingtungdang ahensiya sa gobiyerno ug sa mga utility companies ngadto sa katawhan pagdaginot ug pangpundo og tubig ug pag-conserve og elektrisidad.

Apan, as usual, kutob ra sa pahimangno. Ang gikinahanglan mao ang konkretong aksiyon gikan sa kagamhanan ug mismo sa katawhan aron mas maibsan pa ang epekto sa maong El Niño phenomenon.

Hinaut nga andam ang tanan ini'g abot sa dakong hulaw. Hinaut nga ang gobiyerno seryoso sa pag-implementar unya sa mga mitigating measures.

Labaw sa tanan, hinaut nga dili usab magsalig ang katawhan sa ilang preparasyon batok sa maong kalamidad.