MCWD contractors!

Ngano kaha kining mga kontraktor sa Metro Cebu Water District (MCWD) nga pangbiyaan man ang ilang proyekto nga dili mahuman, ug makahasol na hinuon sa katawhan?

Nagtuo ko nga dili ra kay ang proyekto sa mga kontraktor sa MCWD diri sa Barangay Apas, Cebu City ang nakasinati niining way ayo nga trabaho sa maong mga kompaniya.

Ang mga tawo magtuo man nga ang MCWD maoy direktang nagtrabaho niining maong pipe-laying projects nga nakahasol na kaayo kanila kay ang karsada giguba ug wa ibalik sa naandang sitwasyon.

Gikan sa Barangay Hall sa Busay, subay sa GMA Road paingon sa Sitio Upper Panabang, naghimo og pipe-laying project ang kontraktor sa MCWD, apan gibiyaan nga wa mahuman.

Ang karsada giguba nila ug nahasol tawon pag-ayo ang mga moagi kay pwerteng gubaa na sa karsada, ilabi na diha sa Sitio Grotto paingon sa Upper Panabang nga nalungag-lungag ang karsada, bisan ang mga motor lisud makaagi.

Mao sab kini ang nahitabo sa susamang pipe-laying project sa MCWD gikan sa Sitio Fatima, Apas paingon na ngadto sa 6th Street. Ngano man gyud mong mga kontraktor sa MCWD nga ingon niini man ang inyong kinaiya?

Tingali ang ubang kontraktor sa MCWD didto sa kabukiran, ingon usab niini nga gipangbiyaan lang ang ilang mga gilungag sa karsada nga gilubngan sa mga tubo nga wa sementoha.

Sa bukid, mapasanginlan tawon ang JE Hydro & Bio-Energy Corporation, ang supplier og tubig sa MCWD gikan sa Barangay Lusaran, nga maoy naghimo niini, bisan og wa sila’y labot.

Awhagon nako ang higala ko nga si MCWD General Manager Edgar Donoso, ug ang chairman sa MCWD Board nga si Engr. Mike Pato nga tawgon nila ang atensiyon niining ilang mga kontraktor.

Ang gikuyawan nako kon mokubra na sila sa bayad nga wa nila pangsementoha ang ilang gilubngan sa mga tubo sa tubig. Kon ila kini nga himuon, dili kini maayo sa MCWD kay moabot ang higayon nga mogimaw kining gilubong nila nga tubo.

Posible pa gani nga dunay mga bilyako nga maniubrahon aron nga makakuha sila’g koneksiyon nga tubig sa ilang panimalay gikan sa wa mataboni nga tubo daplin sa karsada nga dali ra’ng makuykoy.

Apan labaw sa tanan, alkanse ang MCWD kon ang sabot, sementohon ang ilang gilubngan sa mga water tubes, unya diay wala kini himoa sa ilang kontraktor.

Usbon ko, daghan kaayo ang mireklamo kanako nga mga lumolupyo sa Sitio Grotto ug Upper Panabang kay lisud na kaayo agian ang karsada gilungan apan wa ipahiuli sa naandang sitwasyon.