Oplan Pakigsandurot

Dako kaayo ang ikatampo sa katawhan sa pagpatuman sa kahapsay ug kalinaw sa katilingban kay sila ang nasayod sa mga kasikas sa palibot. Busa haum ug angay lang nga gamiton kini sa mga programa sa atong kagamhanan sama nalang sa Oplan Pakigsandurot nga gibanhaw karon sa administrasyon ni Mayor Nestor Archival. Kong wala ko masayop gipatuman na kini kaniadto sa panahon ni kanhi Mayor ug karon Bise Mayor Tomas Osmeña.

Ang gitahasan sa pagdumala sa Oplan Pakigsandurot ang Committee on Peace and Order ubos ni Konsehal Paul Labra kinsa kanhi dakong opisyal sa kapolisan ug siya usab ang nangamot niini kaniadto sa pagpatuman sa oplan dihang aktibo pa siya sa serbisyo sa Cebu City Police.

Ang pagpakigsandurot dili na kaayo nato mabatian karon kay lawom kini nga termino nga nagpasabot nga pakighugoy hugoy, samot lawom gihapon, pagpaduol sa katawhan aron sayon masabtan. Uban ang kapolisan nga maoy mopatuman niini ang makigsandurot sa mga tawo, reaching out sa ininglis pa.

Inay kahadlokan, sila ang makighigala sa katawhan aron makuha ang simpatiya ug loyalty sa mga tawo ug sayon kaayo ang pagkuha sa suporta sa mga ipatuman nga programa.

In fairness sa Cebu City police ubos sa pagdumala ni Col. Enrico Figueroa,adunay mga inisyatiba nga gihimo sa pagpaduol sa mga tawo ug sa paggukod sa mga malapason sa balaod, ang Oplan Bulabog nga gipadayon niya sa iyang mga nasundan nga opisyal. Naugnan lang ko atong police outpost nga giwagtang sa ilang labaw sa PNP kay epektibo kaayo kadto sa crime deterent ug sa pagsumpo gyud sa krimen.

Ang Oplan Pakigsandurot maisip nga proactive measure sa Cebu City LGU ug sa PNP sa pagseguro nga mamintinar ang kahapsay ug kalinaw sa dakbayan. Magpanuko na ang mga tawo sa paghimo og krimen kay ang katawhan naman ang ilang kontra ug motugyan kanila sa mga tinugyanan sa balaod.

Unta masustinehan kini nga programa kay dako kaayo kini og ikatabang aron mamahimong hapsay ang atong kinabuhi nga dili pangulbaan sa mga nagpahipi nga dautang elemento sa palibot.

Ang pakigsandurot wala magpasabot nga mahimong abusahan sa mga tawo ang pakigsuod sa kapolisan kay kong dunay makasala aw seguradong mabalhog sila sa bilanggoan.