Asa kutob ang paugat
Kon masubay na ang tanang mga dokumento sa Metro Cebu Water District (MCWD), nga mahimo lang kon tangtangon ang mga sakop sa Board of Directors, kay sila ra may magbuot unsay ipakita ug unsay itago, mahimong mahibaw-an nang mosunod:
• Overpriced ba ang P87 bilyones nga water supply contracts nga gisudlan sa board nga gipangulohan ni kanhi Chairperson Joey Daluz; ug
• Tinuod bang dunay mga opisyal sa board ug management nga niburot sa komisyon sa mga transaksiyon nga moresulta sa mas dakong bayranan sa mga konsumidor ug posibleng pagka-bangkarota sa MCWD.
* * *
Apil sa kahibulongang mga transaksiyon nilang Daluz ug kaubanan mao ang pagtakda og managsamang bayranan nga P73.86 kada cubic meter sa desalinated seawater contracts bisan managlahi ang mga lugar ug mga sirkumstansiya.
Pananglitan: P73.86 kada cubic meter ang presyo sa Mambaling II Potable Bulk Water Project sa Pilipinas Water Resources, Inc. Nga igo lang nisuyop sa groundwater sa Mambaling (maong nitiyabaw ang mga molupyo nga naughan ang ilang mga bomba). Ug busa wala magkinahanglan sa mas komplikado ug mas gastusong proseso sa desalination sa pagsuyop sa dagat.
* * *
Katingalahang transaksiyon naglambigit ni kanhi Gobernador Gwen Garcia: Pagdoble sa presyo sa tubig gikan sa Carmen nga napalit sa MCWD sugod niadtong 2012 pinaagi sa joint venture sa Kapitolyo nga gipangulohan ni Garcia ug Manila Water Consortium Inc. nga gidumala sa mga Ayala.
Human nibiya ang mga Ayala sa 2023 kay giaway ni Garcia, nibanos ang kompaniya ni Enrique Razon, nga dunay dakong kalainan: Ang orihinal nga presyo nga P24.59 kada cubic meter nahimo nang P58 kada cubic meter.
* * *
Nisuway pero napakyas si kanhi Cebu City Mayor Mike Rama pagbungkag sa grupo ni Daluz. Kinsa giduphan ni Gwen Garcia. Maong si Bise Mayor ug water czar Tommy Osmeña niawhag sa Local Water Utilities Administration pagtangtang sa board tungod sa mga pasangil sa anomaliya ug posibleng pagka-bangkarota.
Kay bisan napilde sa eleksiyon silang Daluz, Gwen Garcia ug kanhi Mayor Raymond Garcia, masaligon ang mga nahibilin sa board–Miguelito Pato, Jodelyn Mae Seno, Ferdinand Pepito ug Marlo Maamo–nga duphan silang kanhi Presidential Assistant Mike Dino nga sikit ni Senador Bong Go. Tan-awon nato asa kutob ang ilang paugat.
* * *
- Latest
