Pabor batok supak

Dili lang simple nga piniliay ang Mayo 12, 2025 nga bugnong lugaynon. Tungod kay nakasandig niini ang kapalaran ug kaugmaon sa politika ni Bise Presidente Sara Duterte Carpio. Ang moabot nga bugnong lugaynon panagbagat kini tali sa mga pabor ug supak sa pag-impeach o pagtangtang sa katungdanan sa Bise Presidente.

Hinumdomi nga ang Senado dako kaayo og role sa impeachment proceedings tungod kay ang mga Senador ang magsilbi niining huwes. Ang mga senador mao ang magdiktar sa kaugmaon sa politika sa bise presidente. Duha sa matag tulo ka senador (2/3) o 16 sa 24 ka senador ang gikinahanglan nga mobotar sa pagtangtang sa Bise Presidente sa iyang katungdanan.

Busa mahinungdanon kaayo sa bise presidente nga modaug sa pagka senador ang mga kandidato nga iyang kaalyado ug supak sa pagtangtang kaniya. Sama nga mahinungdanon usab sa iyang kontra sa politika nga modaug sa pagka senador ang mga kandidato nga pabor sa pag impeach sa bise presidente.

Ang pag-impeach sa bise presidente gikinahanglan gayod sa iyang mga kontra sa politika kay mao na kini magpatay sa oportunidad sa bise presidente sa paglingkod sa Malakanyang human 2028 nga bugnong lugaynon.

Hinumdomi nga ang epekto sa impeachment dili lamang kutob sa pagtangtang sa bise presidente sa iyang katungdanan kun dili apil usab niini ang pagdili na kaniya sa paghupot og tinudlo o pinili nga katungdanan sa nasud.

Sa pagkakaron wala pay makapildi ni Bise Presidente Sara Duterte Carpio sa pagka Presidente sa 2028 nga piniliay sa pagka Presidente. Maong tangtangon gyod siya pinaagi sa impeachment.

Kun gusto nimo nga ma-impeach ang bise presidente, aw botaran nimo ang mga kandidato nga pabor sa pag impeach kaniya. Pero kun supak ka sa pag-impeach kaniya, aw imong botaran ang mga kandidato pagka senador nga supak sa pag-impeach kaniya.