Dili na makalikay sa tulobagon ang mga pet owners

Sugod sa sunod buwan sa Hulyo hingpit nang ipatuman sa dakbayan sa Sugbo ang mandatory microchipping sa mga iro ug iring isip pagpalig-on sa reponsible pet ownership. Matud sa pangulo sa Department of Veterinary Medcines and Fisheries kon DVMF nga si Dr. Alice Utlang, ipahigayon ang pagtaod sa microchip inig rehistro sa mga pets.

Tumong niini nga mapugos ang mga tag-iya sa pagtubag sa ilang responsibilidad ilabi na kong makapaak kini kay kasagaran sa mga tag-iya kong makasala na ang ilang mga pets labi na kong maglatagaw molimod dayon aron makalikay sa ilang tulobagon.

Sa microchip nga ibutang sa panit sa iro, dunay importanteng detalye sa data sa mga tag-iya apil na ang address ug ang cellphone numbers aron dali ra gyud mailhan ug matoltolan sa higayon nga gikinhanaglan. Duna usay map locator nga maadto dayon sa mga tinugyanan sa DVMF ang tag iya nga dili gyud makatago.

Adunay P200 nga bayad sa magpataod og microchip apan kong dili motuman niini makamulta og P2,000 ang mga molapas sa ipatuman nga lagda sa dakbayan sa Sugbo. Ang microchipping kasamtangan na kining gipatuman apan voluntary. Karong Hulyo sa pagsugod na sa bag-ong administrasyon himoon nang mandatory.

Maayo kini ang gihimo sa DVMF ubos ni Dr. Alice Utlang kay gamit kayo. Kong adunay mga iro nga mabiktima sa pagpangabuso o ba kaha kawaton dali nalang kini nga pangitaon. Labaw sa tanan mahatagan na og kasegurohan nga dili sila mapagsagdan sa mga pet owner kay aduna namay commitment sa ilang responsibilidad.

Kong dili makahimo sa paghatag og insaktong pag atiman sa mga pets dili nalang magpatugatuga kay luoy intawon ang mga hayop. Apan labaw nang luoy ang mga tawo nga mapaakan nila nga mosangpot pa gani sa kamatayon kon adunay rabis ang mga iro ug iring.

Ang pagpamuhi og hayopan dili gyud sayon kay kinahanglan kini og compassion, dili lang himoon silang gwardiya sa mga balay o kabtangan kon dili miembro sa pamilya. Dili lang panggaon ang mga iro ug iring sa panahon nga nindot pa sila kon dili hangtud na kong ugaling magkaproblema na.

Naay uban nga kong kagiron na ang mga iro dili na dayon nila atimanon, pasagdan nalang nga maglatagaw sa kadalanan. Ang mga tag-iya nga ingon niini maayo gyung pangduklon o ipapaak sa mga rabid dog aron motabang.

Dunay uban nga nakasaway nga dili maayo nga butangan og microchip ang mga pet kay sakit kuno sa ilang bahin apan mas mapanalipdan sila ug ang mga tawo sa ilang palibot kong masayran ang ilang data ug ang impormasyon sa mga nanag-iya nila.

Unta madayon kini dili lang kutob sa plano. Mao kini ang usa sa mga legasiya nga ibilin ni Dr. Utlang nga moretiro na sa hinapos nga bahin niining tuiga, ang lig-on nga responsible pet ownership.