Nakababahala na ang kidnapping sa bansa
Nabahala na si President Ferdinand Marcos Jr. sa sunud-sunod na kidnapping sa bansa matapos na makapagtala ng 12 kidnapping cases na ang 10 sa mga ito ay mga negosyanteng Chinese.
Kaya agad na ipinag-utos ni Marcos kay Philippine National Police (PNP) chief Gen. Rommel Francisco Marbil ang agarang imbestigasyon para matukoy kung anu-anong grupo ang kumikilos ngayon sa pagkidnap ng mga Chinese.
Kinondena ng Federation of Filipino Chinese Chamber Commerce Industries Incorporated (FFCCCII) ang aksyon ng PNP upang protektahan ang mga negosyanteng Chinese na nagiging target ng mga sindikato o criminal.
Noong Miyerkules, nakitang nakabalot sa plastic bag ang negosyanteng si Anson Que at ang drayber nito sa madamong lugar sa gilid ng highway sa Rodriguez, Rizal.
Ayon kay Barangay Chairman Juanito Catayoc ng Bgy. Macabud, nakita ng ilang residente ang kahina-hinalang nakabalot sa plastic bag kaya agad nila itong inireport sa kapulisan.
Dinala ang mga bangkay sa Camp Crame at doon na kinumpirma ni BGen. Jean Fajardo, spokeperson ng PNP na ang biktima ay ang negosyanteng si Anson Que at ang drayber nito. Si Que ay ilang araw nang nawawala mula nang umalis sa kanilang bahay sa Valenzuela City.
Ayon sa mga kaanak ng biktima nagbigay sila ng P100 milyon sa mga kidnapper ni Que.
Nagpakalat naman ng mga tauhan itong si Calabarzon Police Director BGen. Paul Kenneth Lucas upang i-backtrack ang mga posibleng dinaanan ng mga suspek. Naglagay siya ng mga check point sa ilang lugar partikular na sa mga kalsada sa Batasan, Quezon City.
Sinibak naman ni Marbil ang bagong promote na si BGen. Elmer Ragay ng Anti-Kinapping Group. Sa tingin ni Marbil ay nagkukuya-kuyakoy lamang si Ragay sa kanyang malamig na opisina. Sunud-sunod na ang kidnapping pero hindi kumikilos si Ragay kaya nagalit si Marbil.
Sa tingin ko, kulang ang mga checkpoint ng PNP. Palagay ko ang tinututukan ng mga pulis ay pagbibigay ng proteksiyon sa mga kandidato.
Ano ang aasahan ng mamamayan sa kapulisan? Kailangang mahuli ang mga sindikatong dumudukot at pumapatay sa mga mayayamang negosyante sa bansa. Kilos PNP!
- Latest
