Chrism Mass

Niadtong Abril 8, 2025 gihimo sa mga kaparian dinhi sa atong Artsidyosesis sa Sugbo ang Chrism Mass ingon man ang pag renew sa Priestly Vows. Sa maong higayon anaa usab ang mga layko nga nitambong ug nisaad sa ilang pagbulig sa mga kaparian diha sa kinabuhi sa Misyon.

Human sa maong okasyon nilakaw ko alang sa mga laing mga tuyo sa dakbayan. Gikan sa remittance hangtud na sa pangumpra, pagduaw sa mga higala ug pagpauli. Halawom na ang kagabhion sa among paghiabot gikan sa dakbayan. Wala dayon ko mahikatulog. Gisud-ong ko una ang krusipiho nga nagpilit sa bungbong sa akong kwarto.

Ang krisma simbolo sa pagpili ingon man sa pagkonsagrar. Akong nahinumdoman kaniadto kang Bishop Dennis Villarojo siya nagkanayon: “Pasalamat sa Dios nga ikaw gipari! Daghan ang nagtinguha apan wala sila mahatagi og kahigayonan! Gasa kini gikan sa Dios! Ayaw ipha ang mga kalisdanan! Hinunoa ipha ang mga panalangin! Gipanalanginan ka man nan, ipaambit ang maong panalangin! Ayaw pag-angal!”

Sa laing bahin, ang krisma nagsimbolo og konsagrasyon. Gamiton ang mga kamot sa pagpanalangin ug dili sa pagdagmal. Gamiton ang kinabuhi sa pagkapari diha sa pag-alagad ug dili sa pagpuyo sa mga kinabuhi sa prebelihiyo. Puy-an ang kinabuhi alang sa Ginoo ug tungod sa gugma sa Ginoo. Kun unsaon man kini paghimo ug pagpuyo tingali mahinungdanon kining mosunod:

Pag-ampo sa kanunay sanglit halayo sa Dios wala man kitay mahimo. Anaa sa Dios ang kalig-on ug kusog. Anaa kaniya ang tinong seguridad.

Katilingban

Bisan tinuod kun diha sa ordinasyon ang pari gi set apart gikan sa katawhan apan siya nagpuyo mismo sa katilingban aron mangalagad sa katilingban sa mga isig ka pari man o sa mga layko.

Pangalagad

Ang pagkapari dili propesyon kondili tawag kun bokasyon. Kun asa ang dapit o luna nga makaalagad siya sa Dios ug sa katawhan, iya kining pasalamatan. Dili tungod kay ang maong dapit daghan siya og makuha kondili sa dapit diin daghan usab siya og mahatag. Dili sa iyang kaugalingong pahanungdan kondili alang sa Dios nga iyang gialagaran.

Tinuod kanunay’ng sayop ang pari ug dili siya hingpit. Adunay mas molabaw pa kaniya. Apan kun siya mamatay, bugtong pari lang usab ang makahulip sa iyang dapit.