Mga badlongong driver sa publikong sakyanan pagbantay mo!

Gipahugtan karon sa Highway Patrol Group HPG sa Region 7 ang pagbadlong nila sa mga drivers ug konduktor sa mga pampublikong sakyanan nga naglakip sa mga modern ug traditional PUJ, taxi ug mga buses kay daghan na sila og reklamong nadawat gumikan sa kabadlongon sa mga driver nga magpataka nalang og hunong. Bisan gani kon adunay mga enforcers wala nay respeto sa mga otoridad, dili na mobasa og mga signages nga gibutang sa mga karsada nga daw wala na motuo sa lagda sa trapiko.

Subay niini mipahigayon og testing ang mga personnel sa Highway Patrol Group-7 sa uptown area ug ilang nasuta nga aduna gyuy daghan ang nagpabadlong dili lang sa mga kakuwang sa mga papeles kon dili apil na gani ang kalimpyo sa panglawas ug sinul-oban sa mga drivers sa mga PUJ. Adunay wala na mosunod sa dress code o haum nga pamiste sa mga drivers, nag tsinilas nalang, nag tshirt ug ang uban nagsando ug nagshort pants lang nga dakong kalapasan usab sa lagda sa kadalanan matud sa opisyal sa HPG.

Tinuod nga nigara na ang uban tungod seguro kay wala may saktong aksiyon ang mga enforcers. Apan sa gihimo karon sa HPG ug hinaut nga mamintenar kini ug madisiplina gyud ang mga abusadong drivers kinsa gibaharan nang daan nga isyuhan og Temporary Operators Permit o TOP sa HGP kong masakpan nga adunay mahimong kalapasan. Limitado ang manpower sa HPG ug gikinahanglan nga makig-alayon sila sa mga enforcers sa mga lokal nga kagamhanan sa ilang operasyon ug tinod-on ang pag gukod niining mga badlongon nga drivers.

Pwera sa mga buotan ug ligdong nga mg drivers, aduna gyuy mga balasubas ug walay batasan. Himoon nakong sanglitanan ang mga PUJ nga magbiyaan padung sa Plaza Housing nga mohunong sa tunga sa karsada kong mo-load ug mo-unload og mga pasahero. Bisan sirbatohan gahi gyud kaayo maong malangan intawon ang gasunod, samot na nga mo-parking pa kay maghuwat og pasahero, walay hunahuna nga adunay maperwisyo sa ilang gihimo.

Pipila lang kana sa mga violations nga ilang gipanghimo. Dili man tanan atong klarohon kay dunay mga law abiding drivers apan maamong sila sa mga kauban nilang mga tampalasan nga mga hari sa karsada.

Adunay pakapin nga importante nga awhag sa HPG ngadto sa mga drivers nga atimanon ang ilang lawas. Kinahanglan dili baho ang ilang ilok, magbutang og tawas aron dili makahasol sa mga pasahero nga mag utong utong nalang sa kabaho, isip anaa sa public transport unta hatagan nila og pagtagad ang kalimpyo kay public service man usab ang ilang gihimo.

Dili man seguro sila masilotan kong baho'g ilog apan inisyatiba nalang pud aron dili motagam sa pagsakay ang mga pasahero tungod sa kabaho sa lawas nga ilang masimhot. Labaw sa tanan maglimpyo sila sa ilang lawas tungod ug alang sa respeto sa ilang kaugalingon.