"Dili ni ako, bisan ako ni"

Padayon nga nangulipas si Presidente Marcos, Jr., sa pag-ingon nga dili niya kagustohan nga ma-impeach ang iyang kanhi running mate ug kauban sa nga si Bise Presidente Sara Duterte. Mahinumduman nga si Kongresista Ferdinand Alexander Marcos, ang anak sa presidente, maoy labing una nga mipirma sa impeachment complaint.  Dakong hulga sa administrasyon ang mga Duterte busa, bisan kon tugotan nato nga dili uyon ang presidente, makabenepisyo gihapon siya ni’ng pag-impeach sa bise presidente.  Makapahinumdum sa bana nga bisan nasakpan na sa asawa nga nagpatong kin isa iyang kabit, moingon lang gihapon nga, “Ako diay ni. Tan-awa pag-ayo kon ako ba gyud ni.”  Fezteleern!

Maliso pa’y buko

Namahayag si ML Party-list Representative Leila de Lima nga wala siya matandog sa gipadayag sa Pulse Asia survey nga 50% sa katawhan ang dili pabor sa impeachment ni Bise Presidente Sara Duterte.  Dugang pa ni de Lima, mausab ra ang hunahuna sa katawhan kon masayran na nila ang mga ebidensya nga mapadayag atol sa impeachment proceedings.  Wa kaha masayop si de Lima pagbasa sa pulso sa katawhan?  Bisan sa pagtuo ni de Lima nga mausab ang pulso sa katawhan kabahin sa impeachment, makapahinumdum sa karaan’g pagya nga nagkanayon, “Maliso pa’y buko sa kawayan.”  Muleeng!

Mosaad aron pakyason

Miluwat og maisogon nga pasalig si Presidente Ferdinand Marcos Jr., nga sustenihan gayod niya ang programa nga P20 matag kilo nga bugas luyo sa sentimyento sa katawhan nga pang-optics lamang kining maong proyekto.  Dako og tabang sa mga kabos kining maong programa nga barato’ng bugas sa administrasyon. Hinaut nga matinuod kining pasalig sa presidente nga iyang sustenihan ang maong programa kay kon dili, mahimo na usab kining ehemplo sa linya  sa kanta nga nagkanayon, “Gihimo ko ang saad, aron lang pakyason.” Madahaan!

Gamitan og chlorine

Nangayo ang Sugar Regulatory Administration (SRA) og P10 milyones nga assistance gikan sa Department of Agriculture (DA) aron magamit sa nahauna pagsumpo sa pagpangatake sa dangan nga red-striped soft scale insects (RSSI) sa mga plantation sa tubo didto sa Negros Occidental.  Lupig diay ang mga technician sa DA og SRA sa dangan nga RSSI kay kinahanglan pa man og P10 milyones nga ayuda.  Sugyot pa sa akong amigo, “May’pa spray-han na lang nila ang dangan sa gitunaw nga chlorine nga gisagolan og asin. Wagtang gani ang nikapit nga mantsa, dangan pa kaha. Menos gastos pa gyud.”  Ateerr!

Sipyat sa pag-“purgas”

Giawhag sa DepEd Central Visayas ang mga ginikanan ug mga guardians sa pagpa-enroll og sayo sa ilang kabataan aron maseguro ang hapsay ug sakto nga pag-apod-apod sa mga resource sa publikong tulonghaan.  Dili na angay maghulat ang DepEd sa datos sa enrollment kay basin ulahi na unya kini sa pagtagana sa mga mehoras.  Mahimong mobase na lang sila si forecast sa enrolment kon buot sila nga mahimong pro-active.  Makapahinumdum sa akong silingan nga nasipyat sa iyang gitayaan nga numero sa swertres. Matud pa niya, “Nasipyat gyud ko da, wa matunong sa akong numero nga gi-purgas (gi-forecast).”  Pagkatoytoy!