Dalaygong taras nanggawas sa rehas

The truth will set you free. Kini gimatuod ni Ronnie Suan, alyas Boy Tapang sa YouTube ug ubang social media outlets, dihang napriso siya human gireklamo sa iyang kalib-in didto sa buhatan sa kapolisan, kinsa mialegar nga gidapatan kuno ni Boy sulod sa ilang balay gumikan sa nagdilaab nilang panagsumpaki.

Daghang fans ni Boy ang nadismaya kay nakalitan niining balitaa. Nasundan man god nila sukad sa sinugdanan hangtod sa misulbong na iyang pangalan sa YouTube tungod sa makanunayong niyang pag-vlog og mga makatandog nga contents, diin maoy nakapaila niya nga siya usa ka buotan-kugihan-manggihatagon ug manggiluy-ong tawo. Apan unsa ba kining balitaa nga lagmit makapaguba-makapalaksot sa napondar niyang maayong imahe? Dili kaha pang-April fools lamang kini? Ilang gi-fact check!

Ug pinale nilang nasuta. Tinuod gayod! Kay na-front page-headline man sa nagkalainlaing media outlet. Nakapanglingolingo sila, uy! Pero dihang na-interview si Boy sa mga taga media pagka-sunod adlaw, nanggawas sa mga rehas ang dalaygon niyang taras samtang iyang gisaysay ang kinatibuk-ang esena sa hitabo. Diay, vape ray sinugdanan sa ilang panaglalis. Dili diay siya gustong manigarilyo iyang kalib-in, labi na kay aduna na silay baby. Matang sa bisyo nga kontra kaayo ni Boy. Sanglit, maka-lung cancer baya!  Sa ato pa, pinangga ni Boy iyang paris ug ilang anak.

Hinugdan, gibadlong aron dili masakit. Giangkon niya nga misilaob ilang panaglalis ug misangpot sa pagkapusgay-pasad sa mga mahalong butang nga gipamuak sa iyang ka-live-in, pero bisag mitaas man tuod tingog ni Boy, wala gyod niya kini dagmali.

Gani, dihang misumbong kini sa kapolisan, boluntariyong mikuyog si Boy sa mga otoridad aron maladlad-asoy sab sa iyang habig ang tinuorayng nahitabo. Diin, wala abtig oras, pagkapawong sa kalayo, nagkauli ilang maayong kabubut-on. Unya giatras sa babaye ang sumbong ug gusto nang mamauli sila sa ilang balay. Ug kay dili na man puwede, aw, didto na lang sab matulog-duyog sa naprisong Boy tibuok gabii.

Gumikan sa maong pagpamahayag ni Boy, diin nanggawas sa mga rehas ang naandan niyang mga bulawanong taras: ang pagkamatinud-anon, pagkamapinanggaon ug pagkamaisog sa pagpakig-asdang sa mga suliran sa kinabuhi aron kini mahatagag madaling kasulbaran, pabiling gisaludohan gihapon siya sa iyang milyonmilyong followers-viewers-subscribers. Congrats, Boy!