Makasaysayanong eleksiyon
Daghang mga pangagpas nganong nidaog silang Mayor-elect Nestor Archival ug Vice Mayor-elect Tommy Osmeña sa eleksiyon niadtong Mayo 12. Nag-una ang pagtuo nga gipul-an nang mga Sugboanon sa mga eskandalo ug mga bulilyaso sa niaging mga administrasyon sukad sa 2019 nga maoy gibasol sa pagka-bangkarota sa City Hall.
Nitakdo sang panghunahuna nga kon ikumparar nilang outgoing Mayor Raymond Garcia ug kanhi Mayor Mike Rama ug sa ilang running mates nga silang Joey Daluz ug Dondon Hontiveros, mas takos, mas kasaligan ug mas mapuslanon ang mga nahimo nilang Archival ug Osmeña.
* * *
Lahi ang panglantaw sa mga dumadapig nilang Garcia ug Rama. Gibasol nila ang pagkabungkag sa alyansa sa ilang mga partido. Kumbinsido sila nga kon wala mag-unay, inabagan sa ilang pagkontrolar sa makinarya sa City Hall, mas lig-on unta ang ilang organisasyon batok sa Bando Osmeña Pundok Kauswagan.
Para nila nakapahimulos si Archival ug Osmeña sa kapakyas ni Garcia ug Rama paghusay sa ilang panagsungi. Nga mahilot ra gyod unta kon nakit-an pa nga ang ilang panaghiusa maka-garantiya sa pagpadayon sa unom ka tuig na nilang pagdumala sa City Hall.
* * *
Molalis ang mga dumadapig nilang Archival ug Osmeña: Dugay rang nagsugod ang away sa alyansa nilang Garcia ug Rama. Masubay sa pagsuway ni Rama pagpalagpot ni Daluz sa Metro Cebu Water District. O sa kasong plunder sa garbage deal ni anhing Mayor Edgar Labella. O sa pagsupak ni Rama sa impluwensiya ni kanhi Presidential Assistant Mike Dino nilang Garcia, Daluz ug Labella.
Nga nasamotan dihang nagpabadlong sang grupo ni Rama nga nibisto sa mga ungo sa City Hall.
* * *
Sa iyang bahin, si Osmeña niingon nga ang nahitabo niadtong Mayo 12–pagsalikway sa mga Sugboanon sa lapad nga vote buying aron pagbotar sa ilang gusto–nahitabo na sa nangaging mga eleksiyon:
Dihang nidaog ang iyang amahan nga si Serging Osmeña pagka gobernador sa Sugbo batok sa mga bunguton ug dos por dos sa mga Cuenco ug mga Durano niadtong 1951;
Dihang nidaog ang Pusyon Bisaya batok sa diktadurang Marcos sa eleksiyon sa Interim Batasang Pambansa niadtong 1978; ug
Dihang una siyang nidaog pagka mayor sa Cebu City batok sa incumbent nga si Boy Cuenco niadtong 1988.
* * *
- Latest
