Nitabang bang House sa ICC?
Kon sakto ang kasayuran ni Senador Imee Marcos sa mga petsa sa pag-abot sa mga opisyal sa International Criminal Court (ICC) dinhi sa Pilipinas sa niaging tuig, natunong ang ilang pagduaw human sa pagbalitok ni Koronel Royina Garma sa iyang testimoniya sa House Quad Committee.
Gipakuratan niya ang mga kongresista pinaagi sa pagkumpisal nga gipatabang siya ni kanhi Presidente Rodrigo Duterte pagpangita og opisyal sa Philippine National Police (PNP) nga sakop sa Iglesia ni Cristo (INC) nga kasaligan sa pagpatuman sa tibuok Pilipinas sa template sa Davao Death Squad (DDS).
* * *
Posibleng mao ni hinungdan nga apil sa mga ebidensiya nga gipangita sa taga ICC, kana kon kasaligan ang mga dokumento nga nahipos ni Marcos, mao ang mga dokumento (bank accounts ug call records) nga momatuod sa pangangkon ni Garma sa rewards system sa extrajudicial killings (EJKs).
Maong mas masabtan nganong interesado ang taga ICC nilang Irmina “Muking” Espino (sinaligan ni Senador Bong Go) ug Peter “Pedro” Parungo (sinaligan ni Koronel Edilberto Leonardo, ang opisyal sa INC nga girekomendar ni Garma ug giaprobahan ni Duterte pagpatuman sa nasudnong drug war).
* * *
Kon nakuha sa mga imbestigador sa ICC ang bank accounts nilang Espino ug Parungo, mapakita ni Prosecutor Karim Khan atol sa sunod nga husay sa kaso ni Duterte:
Tinuod bang si Go ang pagador sa rewards system;
Kinsay mga tinubdan sa minilyon ka pesos nga niagi sa iyang upisina (ginganlan ang Philippine Offshore Gaming Operators, Philippine Charity Sweepstakes Office ug confidential ug intelligence funds ni Duterte); ug
Kinsay mga polis nga nakadawat sa mga bayad sa EJKs.
* * *
Kon tinuod ang pagduda ni Marcos nga nagtinabangay nang administrasyon ug ICC, mas masabtan ang kalibogan nga lakang sa mga kongresista:
Gibuhian silang Garma ug Leonardo sa Nobyembre sa niaging tuig bisan gipasanginlan sa pagpatay ni PCSO Board Secretary Wesley Barayuga;
Nawad-an og interes sa pagpangita nilang Espino ug Parungo ug paghipos og dugang mga ebidensiya sa rewards system; ug
Kalit nga nihunong sa imbestigasyon sa papel nilang Duterte ug iyang mga sinaligan sa EJKs ug rewards system ug nipasimang sa nisunod nga public hearings ngadto sa drug smuggling agi sa mga pantalan sa nasud.
* * *
- Latest
