Lawod sa mga basura

Kini ang mosugat sa mga tawo kong moagi ta sa SRP viaduct sa dakbayan sa Sugbo ilabi na kong mopadung kita sa habatang Sugbo, makadapit gyud sa atong mga mata ang nagbanig nga basura dapit sa Pasil nga dili na gani makita ang lapyahan ug ang dagat mismo tungod kay gitabonan na kini sa mga basura.

Gawas pa mangalisbo gyud ang kabaho bisan distansiya ra ang viaduct.

Gani kong modulhog ang sakyanan gikan sa moderno ug iconic structure sa Cebu Cordova Link Expressway makita ug manimaho gyud ang mga basura. Salikwaot nga sa kanindot sa maagian nga imprasytaktura anaa diay sa ilawom niini ang nagtipon-og nga hugaw sa mga tawo.

Personal nakong giadto kining dapita niadtong Biyernes ug naatlan nako nga naghakot sa mga basura ang Department of Public Services gamit ang mga heavy equipment sama sa backhoe ug dump truck kay dili na madala og manomano tungod sa kabaga ug kadaghan na gyud sa mga basura.

Kasagaran sa mga basura mao ang mga empty plastic bottles, sachets, mga nuog o panapton ug uban pa nga inanod kuno sa sapa Mahayahay gikan sa ubang mga barangay sama sa Sawang Calero, Ermita ug Suba.

Kini ang usa sa gitutokan sa gihimong citywide cleanup kagahapong adlawa diin matud sa pangulo sa DPS nga dako kaayong hagit kanila ang paglimpyo niining dapita kay imbudo kini sa lutsanan sa tubig nga nagdala sa mga basura. Gani tonetonelada gyud sa mga hugaw ang ilang makuha, magamay gamayan man kong dunay halapad nga clean up apan dili gyud hingpit masulbad.

Ngano man? Tungod sa kawalay disiplina sa mga tawo nga magpataka og labay sa basura, kahinawo naman ang mga tawo sa angayan ug dili angayang buhaton sa atong hugaw apan passive kaayo ang pamatasan nga walay pagpakabana sa kalikopan ug sa epekto niini. Kuwang og dukol ang mga tawo nga isalig ang tanan ngadto sa kagamhanan ang pagpanglimpyo, bisan og ang hugaw ana ra sa ilang tugkaran.

Kining mga tawhanan walay kalainan sa basura nga ilang gilabay mga baho ug bati nga kinaiya nga angayan iapil sa paglabay.

Sa pagsugod na unya sa administrasyon ni incoming Mayor Nestor Archival, usa sa iyang prioridad ang isyu sa basura, gani sugdan niya kini sa mga department heads nga padad-on na og thumbler kay dili na tugotan ang mga plastic bottled water kay makapasamot sa problema sa basura.

Lauman nato nga mahitabo ang dakong kalamboan niini kay ang umaabot nga mayor usa man ka crusader sa pagpanalipod sa kalikopan.

Samtang isip mabuot nga katawhan mohimo pud kita sa atong responsibilidad nga mao ang pagmintinar sa kalimpyo sa atong palibot