Nilikoy si Trump

Ambot unsay nakaon ni US President Donald Trump nga takulahaw man lang nilikoy ug giabandonar ang unang saad nga likayan kutob sa mahimo ang direktang pagpakiggubat sa Iran ug pillion niini ang kalinaw pinaagi sa diplomasya.

Nakugang ang tibuok kalibotan dihang gipahibawo ni Trump kagahapon sa kadlawon nga malampuson ang ilang gihimong pagpamomba sa tulo ka mga nuclear sites sa Iran---Fordo, Natanz ug Isfahan.

Sa iyang pamahayag, gidetalye ni Trump ang ilang operasyon nga matud pa gihimo sa pwersa sa Amerika uban sa mga sundawo sa Israel.

Mibahad pa si Trump nga dili lang kay kini ang mahiaguman sa Iran kun pillion niini ang pagpanimawos ug magdumili pagsanong sa gusto sa Amerika alang sa bag-ong nuclear deal uban sa Iran.

Matud ni Trump nga hutdon nila og bomba ang tanang nuclear sites sa Iran kun magmagahi ang Iran. Niadtong 2015, si kanhi US President Barack Obama uban ang laing gamhanang mga nasud mitugot sa Uranium enrichment program sa Iran.

Ang Uranium usa ka matang sa mineral nga importanting sangkap sa paghimo og armas nuclear.

Atol sa una niyang termino isip presidente sa Amerika, gi pullout ni Trump ang ilang nasud gikan sa maong kasabutan ubos sa pagtuo nga ang uranium enrichment program sa Iran gigamit sa maong nasud aron pagbaton og nuclear weapon.

Bisan sa pasalig sa pamunoan sa Iran nga dili sila interesado nga magbaton og nuclear weapon, wala motuo si Trump niini.

Busa dihang nakakita siyag rason nga atakihon ang Iran, gipahimuslan ni Trump ang kahigayonan pinaagi sa pagsalmot sa gubat nga iya ra unta sa Israel ug Iran.

Ang gihimo ni Trump nagbutang sa dakong piligro nga mokaylap pa ang gubat lakip sa ubang kanasuran. Unsay makapugong sa ubang mga Arab nga nasud nga mosalmot ug molaban sa Iran?

Ug tungod kay maglisod sila sa direktang pagpakigsakbang sa pwersa sa Amerika, ang mga gagmay nga kaalyadong nasud ang ilang pahimungtan?

Gawas niini, ang gubat dako og epekto sa kalibutanong ekonomiya. Usa sa mga nasud nga siguradong maapektohan mao ang Pilipinas tungod kay nagsalig ta sa atong supply sa oil gikan sa middle east.

Labing siguro tungod sa nahitabo mapaabot ang pagsulbong sa presyo sa gasoline ug diesel diin gipaabot sab nga dunay dakong epekto sa ubang mga produkto ug serbisyo.