EDITORYAL - OFWs papaulion

Giisa na sa Department of Foreign Affairs (DFA)  ang crisis alert level niini sa Israel ug Iran ngadto sa Alert Level 3 tungod sa nagkainit nga giyera sa duha ug kini gipatuman na sugod karon atol ning paghimo sa atong editorial.

Apan sukwahi sa pagtuo o gustong mahitabo sa uban, samtang giawhag nga mopauli ang mga overseas Filipino workers balik dinhi sa nasud, wala kini magpasabot nga pugsanay kini.

Boluntaryo gihapon kun gusto sa mga kababayan natong mopauli tungod sa kabalaka sa ilang sitwasyon. Ang mga Pilipino nga naa sa maong mga nasud karon mahimo nga mohiklin lang una palayo sa mga dapit nga direktang naapektahan sa pagbinawsanay og bomba sa duha.

Sa pikas bahin, gidid-an sab ang mga Pilipino pagbiyahe sa maong mga nasud partikular ang non-essential travel o dili importanteng pagbiyahe didto sama sa pagsuroy-suroy.

Dunay gibanabanang 30,742 ka mga Filipino ang nagpuyo karon sa Israel ug 1,180 sab sa Iran, kasagaran nila mga OFWs ug mga propesyonal sama sa mga nurses, medical professionals, engineers, caregivers, receptionist, magtutudlo ug uban pa.

Usa sa mga problema sa mga OFWs kun mamauli sila balik dinhi sa nasud tungod kay dako kining pahat sa ilang pangnabuhian.

Kaliboang pamilya nila dinhi ang nagsalig sa ilang sweldo ug kun sila mopauli dinhi maglisod nasab sila og balik og pangita og trabaho didto.

Usa pa, ang rason nga sila nanglarga didto mao ang kadako sa deperensiya sa suholan dinhi ug didto nga lisud tupngan basi sa linya sa ilang trabaho dinhi.