Dalaygong serbisyo

Kaduha na gyud ko makasuway nga dihang moparking na unta ko daplin sa karsada, gibadlong ko sa parking attendant sa Cebu City Parking Management Authority (CEPMA) kay ang akong giparkingan, nalapas na sa gitugot nga parking area daplin sa karsada ug posible kini nga ma-tow.

Giingnan ko sa babayeng parking attendant nga diha’y higayon nga ang gibadlong niya wa gyud mopatuo, pagbalik niini nakahilak kay gi-clamp na ang iyang sakyanan sa mga traffic enforcers.

Bitaw, dili ikasuko ang gihimo sa maong parking attendant ug kitang mga motorista, angay pa gani nga malipay kay kon gipasagdan ra ko niadto nga miparking ko lapas na sa gitugot nga parking area, ma-clamp gyud ang akong sakyanan.

Si Cebu City Mayor Raymond Alvin Garcia mihatag og pasidungog ngadto sa kadagkoan sa CEPMA atol sa Cebu City Charter Day celebration kaniadtong Pebrero 24, kay matud sa mayor, ang CEPMA nga kasosyo sa siyudad sa parking management, maayo og binuhatan.

Husto gyud, ang Cebu City government angay’ng makigsosyo og kompaniya nga suheto sa parking management kay pinaagi niini, menos ra og kahasol ang siyudad ug igo na lang modawat og bahin gikan sa ilang makolekta.

Gisugdan kining Public-Private-Partnership (PPP) kabahin sa parking management dinhi sa Cebu City atol sa administrasyon ni kanhi Mayor Tomas Osmeña, ug gipadayon sa termino nilang kanhi mayor Edgardo Labella, Mike Rama ug karon kang Mayor Garcia.

Kaniadto gud, nga ang CITOM pa maoy mangolekta sa parking fees gikan sa mga motorista nga moparking daplin sa karsada, nakadungog ko nga daghang parking attendants nga nakabulsa og kwarta nga para unta sa kagamhanan.

Karon nga ang CEPMA na maoy nagdumala, mahadlok ang mga parking attendants nga maghimo og mga tinunto, kay giingnan sila sa ilang mga opisyal nga taktakon gyud sa trabaho kon masakyan.

Nakighinabi ko og mga parking attendants sa CEPMA, ug nahibaw-an nako nga gituman gyud ang balaod kabahin sa paghatag kanila og sweldo. Mao diay nga mahadlok sila nga mataktak sa trabaho.

Nahunahuna sab nako nga luoy pud baya ang CEPMA kay gikan sa pagsugod sa kontrata niini sa siyudad, nagtubo ang sweldo sa mga empliyado. Kay nagsugod man ang CEPMA sa pagdumala sa parking management niadtong 2018, dihang miigo ang pandemic menos sila og koleksyon kay wa man kaayo’y mga sakyanan nga nanggawas.

Apan ang rekord sa Cebu City Treasurer’s Office nga akong gisusi, gituman gihapon sa CEPMA ang gikasabutan nga paghatag nila og “share” ngadto sa siyudad.

Awhag nako sa mga parking attendant sa CEPMA, padayon sa maayo ninyong pagserbisyo.