Way bahin

Sa iyang pagpangampanya, gipanghambog ni Cebu Governor Gwendolyn Garcia nga Sugbo ang mihatag og pinakadaghang boto sa tibuok Pilipinas kang Presidente Ferdinand Romualdez Marcos Jr. nga mikabat ngasto sa usa ka milyon og tunga (1.5M).

Gipanghambog usab ni Presidente Bongbong Marcos Jr. atol sa iyang State of the Nations Address (SONA) sa miaging tuig nga ang iyang administrasyon nakatukod na og 5,500 ka flood control project ug magpadayon pa kini sa pagpangtukod lukop nasud.

Gipahibawo usab sa administrasyong Marcos nga nakapanghatag na kini og kapin sa duha ka gatos ka libo (259,365) ka mga balay ngadto sa mga benepisyaryo.

Ang Departamento sa Agrikultura nagsige usab og panghambog nga mapalit na ang baratong bugas sa mga Kadiwa Store.

Niining tanan walay bisan usa ka buok nga naabot dinhi sa Sugbo.

Sa 5,500 ka flood control project walay bisan usa niini ang gitukod dinhi sa Sugbo. Nakahibawo namo dili lang ang kaulohan ang magbaha. Gani, ang dakbayan sa Mandaue bisan walay uwan.

Sa 259 mil kapin ka mga balay nga gipanghatag sa gobyerno ni Presidente Marcos Jr. aduna bay mga taga Cebu nga nakadawat niini? Sa mga taga Cebu nga nakadawat man gani sa balay hala iisa ang inyong kamot.

Sa gipanghambog sa administrasyong Marcos nga baratong bugas nga gibaligya sa mga Kadiwa Store, nakapalit ba kamo? Aduna bay Kadiwa Store dinhi sa Sugbo, di ba wala?

Kun si Cebu Governor Gwendolyn Garcia ang atong tuohan, ang Sugbo ang naghatag og pinakadaghang boto ngadto ni Presidente Bongbong Marcos niadtong 2022 nga Presidential elections nga miabot og 1.5 ka milyon.

Pero nganong sa mga proyekto ug programa nga gipanghambog sa administrasyong Marcos nganong wala man niya bahini ang Sugbo? Wala bay utang kabubut-on ngadto sa mga Sugboanon si Presidente Bongbong Marcos?