Mga uhong sa kabukiran pwede na sa sulod sa balay

Kaniadto sa among probinsiya malipay gyud mi nga magkusog ang uwan ug magdugdog ug kilat kay pagka ugma segurado nga adunay mga uhong o mushrooms nga motubo sa kadarohan ug bisan sa kawayanan. Ang akong kinaham ang libgus kay bisan og walay bitsen lami na bisan og sabwan.

Mao kini ang akong childhood memories nga hangtud karon ako gihapon nga gihandum. Wala na ko nakatilaw og ingon niini nga kalan-on sa pagkakaron ilabi na nga naa na ko sa siyudad. Hinoon adunay mga mushrooms pero baligya na sa mga dagkong tingdahan o supermarket.

Apan nahingangha ko dihang miadto ako sa bukirang Barangay sa Sirao diin adunay mushroom growing house nga gipanag-iya sa pribadong indibidwal, sa kasamtangan kapin 7,000 ka mushroom fruiting bags ang gibutang sa usa ka growing house nila pero matud sa tag-iya 20 ka mga bags ang maigo sa balay nga gitukod alang sa mga uhong. Nindot kaayo tan-awon nga dili lang magsalig sa kinaiyahan kong kanus-a ka makapanguha og mushrooms kay pwede na tibook tuig bisan kada adlaw pa makakaon ka og uhong.

Labaw sa tanan ang mushroom growing house naghatag og desenting panginabuhian sa mga mag-uuma nga nag-atiman sa pagpatubo niining mga uhong nga hilabihan diay ka kote ug inatiman kaayo apil na ang gibugnawon ug giinition sa panahon kinahanglan timplado gyud aron dili madaut ang mga uhong.

Ang mga materyalis nga gikinahanglan talagsaon usab ug sineguro nga haum sa gipatubo nga mga uhong. Metikuloso kaayo ang pagpatubo niining pagkaona pero magbunga og dakong grasya basta magkugi lang matud pa sa tag-iya ug sa mga mag uuma nga iyang gipiyalan sa pagtikad niini.

Karon pa lang dako na kaayo ang merkado nga nagkinahanglan sa mushrooms nga dili na gani maato nila ang mga orders tungod sa ka in demand niini sa mga dagkong hotels and restaurants maong makaingon kita nga adunay potential kini nga makatabang gyud sa mga mag-uuma kay mahal usab ang presyo. Sa sinugdanan ra ang lisod apan kong masugdan na og harvest diretso na ang kita.

Nahimo kining napalambo sa pribadong indibidwal ni Connie Barrientos-Carey ug sa iyang bana uban ang ilang mga sinaligang mag uuma. Unta molampos pud ang susamang proyekto nga gilantaw sa lokal nga kagamhanan sa dakbayan sa Sugbo kay duna matud pay dakong gahin sa kwarta alang niining programaha.   

Dugang kita sa mga tawo nga dili na kinahanglan magbuwad og init kay inatopan man ang balay nga butangan niining mga mushrooms. Ako sad diay ilhon ang kabuotan sa tag iya niining uhongan kay gilibre niini ang tanan nga panginahanglan sa iyang mga katabang nga mag-uuma.

Gihimo pa nga scholar ang anak niini ug labaw sa tanan gitugotan silang motikad sa luna gawas sa mushroom house sama sa mga utanon nga dili bahinon ang kita. Dili kahibudngan nga gigrasyahan ang tag-iya tungod sa maayong gawi nga iyang gihatag ngadto sa mga mag-uuma.