EDITORYAL - Wala sa timing?

Gipirmahan ni Presidente Ferdinand Marcos Jr. ang usa ka executive order nga nagmando nga papun-an og P200 ang kasamtangang subsistence allowance sa mga sakop sa Armed Forces of the Philippines.

Ang subsistence allowance sa kasundalohan sa pagkakaron P150 ra kada adlaw. Mao kini ang ilang gastohon para sa ilang pagkaon, sinina, ug uban pang panginahanglan adlaw-adlaw.

Sa gipirmahang executive order ni Marcos, nahimo na kining P350 kada adlaw karon. Dako kini og matabang sa kasundalohan ug sa ilang pamilya tungod kay matag buwan mapun-an ang ilang madawat og P10,500.00.

Samtang maayo kini para sa kasundalohan, murag wala sa timing kay naa karon tunga-tunga sa kaguliyang sa politika ang nasud nunot sa pagsikop ug pagdala kang kanhi presidente Rodrigo Roa Duterte didto sa The Netherlands tungod sa kasong crimes against humanity nga gipasaka batok sa kanhi presidente.

Murag og madudahan nga “suborno” kining dugang allowance. Apan kun suborno kini, nganong dili man ang Philippine National Police maoy gihatagan nga sila man maoy nitabang sa INTERPOL pagsikop kang Duterte?

Apan una pa unta magsaba-saba ang mga trolls diha sa social media, maayo unta og basahon una nila ang sinugdanan niini aron dili magpataka og post og fake news.

Kaning maong umento sa subsistence allowance naaprubahan kini niadto pang naghinapos nga buwan sa Disyembre atol sa Bicameral Conference Committee para sa 2025 General Appropriations Bill (GAB), sa wala pa nahitabo ang pagdakop kang Duterte.

Mao ni ang nakalisod karong panahona nga dunay kasikas sa politika sa nasud tungod kay bisan unsang mga maayong buhaton karon sa gobiyerno, madudahan gyud gihapon kay daghan kaayong kugihan nga maghimo og fake news sa social media.