Makada-ot ba ang vote-buying?

Gidayeg sa Comelec ang e-wallet app nga GCash tungod sa pag-imponer niini og limit sa temporary daily transfer aron mapugngan ang vote-buying sa umaabot 2025 national ug lokal election.  Aduna tingale diyotay nga positibo’ng epekto batok sa vote-buying kining gibuhat sa GCash apan dili gayod gihapon kini hingpit nga makasanta niini.  Daghan ang pamaagi sa vote-buying.  Apan dili kanunay makadaut ang vote-buying kay makapa-aghat man kini sa tawo pagbotar.  Kay ginaingon man nga, “Ang laksot nga mga opisyal napili tungod kay adunay  mga maayong tawo nga wala mobotar.”  Fezteleern!

 Sama sa putyokan

Namahayag si NBI Director Jaime Santiago nga nagmugna og plan of action ang ilang ahensiya batok sa mga tig-pakatap og mga fake news nga nag-operate dinhi sa sulod ingon man sa gawas nasud.  Dugang pa ni Santiago, na-ilhan na sa NBI ang daghang mga trolls ug nasayran na usab nila ang ilang kalambigitan tali sa mga prominenting personalidad.  Sayon na lang karon ang pagsabwag og balita, matinuod man o dili.  Atong ikahinangop kini’ng pagabuhaton sa NBI apan basin makawang lang kining ilang paningkamot kay ginaingon man nga “Ang mga fake news sama sa mga putyokan. Bisan unsaon nimo kini pag-puhag, dili gayod kini ma-puo.”  Madahaan!

 “Limod hangtud patay”

Matud pa ni Palace Press Officer Claire Castro, dili na kinahanglan pamatud-an sa mga sakop sa kapolisan ug sa armado’ng kusog ang nga sila nagpabilin’g maunongon ngadto sa kasamtangan’g administrasyon.  Mahinumduman nga mikatap ang balita nga adunay mga polis ug mga sundalo nga mi-demetir sa ilang katungdanan agi’g protesta sa pagdakop ni kanhi presidente Rodrigo Duterte.  Gipanghimakak hinoon kini sa PNP ug sa AFP.  Makapahinumdum kining gibuhat sa Malacanang sa motto sa bana’ng dokirok ug himabaye nga, “Limod hangtud patay.” Fishkots!

 Away sa mga elepante

Matud pa sa Cebu City Legal Office (CLO) walay basehan ang alegasyon sa konseho nga adunay mga discrepancy ang hangyo nga gisumiter ngadto sa Comelec kabahin sa exemption sa ban sa pag-gasto sa kwarta sa gobyerno sa panahon sa eleksyon ug nga nahiuyon kini sa bersyon nga naaprobahan sa konseho.  Bentaha gayod kon adunay mga ‘fiscalizer’ sa konseho nga mo-scrutinize sa mga proyekto nga ipatuman sa administrasyon. Apan kinahanglan nga hatagan nila’g prayoridad ang kaayohan sa katawhan kay ginaingon man nga, “Kon mag-away ang mga elepante, ang mga hulmigas gayod ang masikwate.”  Muleeng!

 Work from home

Gisalikway sa Pasig City Regional Trial Court Branch 159 ang hangyo sa gidetiner nga si Pastor Apollo Quiboloy nga ipa-ubos lang siya sa house arrest.  Matud pa sa korte, dili igo ang ang mga pagtoo nga adunay posibilidad nga mokunhod ang iyang panglawas. Makatarunganon ang hukom sa korte. Kon dili gayod tataw nga masakiton ang detenido, dili angayan nga ipa-ubos kini sa house arrest.  Makapahinumdum sa nangaplay isip kasambahay (katabang) nga imbes dawaton na unta kini sa iyang gi-aplayan, mihangyo man hinoon nga, “Maam, pwede ba nga adto ra ko mopuyo sa among balay unya ‘mag-work from home’ lang ko.” Pagkatoytoy!