Alaot ang mga enhinyero

Mipasaka sa Senador Aquilino “Koko” Pimentel og resolusyon nga nag-awhag sa Senado nga mopahigayon og imbestigasyon kabahin sa nahitabo’ng pagka-hugno sa mga tulay dinhi sa nasud ug aron usab masuta ang mga kalapasan sa mga opisyal sa kagamhanan ug mga kontraktor nga maoy responsible sa maong paghitabo.  Dili na tingale kinahanglan ang imbestigasyon.  Ang pagkahugno mismo sa tulay igo na nga basehan aron taralon kadtong mga sad-an.   Mao kana’y giingon nga, “Ala-ot ang mga enhinyero kon itandi sa uban’g propesyon.  Dili niya malubong sa yuta ang iyang sayop sama sa mga doktor.  Dili usab niya mahimong tuison ang kamatuoran o ba kaha, basolon ang huwes, sama sa mga abogado.”  Muleeng!

Mohilak bisan hayop

Gipahibalo ni DOTr Secretary Vince Dizon nga gitaktak na sa ilang katungdanan ang lima ka LTO enforcer nga mi-harass ug midagmal sa usa ka drayber sa motorsiklo didto sa Panglao, Bohol.  Matud sa kalihim, isip mga empleyado sa gobiyerno, sulogoon lamang sila sa katawhan ug dili mga ginoo busa dili makataronganon ang gibuhat sa mga enforcer.  Angayan panaminan kining gibuhat ni Secretary Dizon labi na niadtong mga abusado’ng empleyado sa kagamhanan.  Sangko tingale sa langit ang pagbasol karon sa lima ka enforcer. Haum kanila ang ulohan sa drama nga nagkanayon, “Hayop ka man, mohilak ka usab.”  Mirisiii!

Maayo pa ang hulmigas

Mipasalig si PCO USec Claire Castro nga motubag ug moatiman gilayon ang kagamhanan sa mga dautang epekto sa umaabot nga ting-init apan dali usab siyang miangkon nga wala pa nila mahisgoti kon unsaon sa administrasyon pagpanalipod ang sektor sa agrikultura batok sa kadaut nga dala sa sobrang kainit. Binulay-og ang tubag ni USec Castro.  Tataw nga hangtud karon dili pa gihapon andam ang gobiyerno sa pag-atubang ug pag-atiman sa mga suliran nga dala sa nag-usab-usab nga panahon.  Matud pa sa akong amigo, “Mas maayo pa kanato ang hulmigas kay kanunay pa nangandam bisan walay kakulian.” Fezteleern!

Kauban sa kartel

Misaad ang mga sakop sa quinta committee sa Kongreso nga ilang paningkamotan nga mapa-kubsan ang presyo sa bugas, Giawhag usab nila Anti-Agricultural Economic Sabotage Enforcement Group sa pagmugna ug pagpatuman sa usa ka framework sa pagpuhag sa mga kartel ug pagpugong sa price-fixing.  Nagpunay na lang og pa-ukyab ang administrasyon kabahin sa pagpakunhod sa presyo sa bugas apan wala gyu’y natuman sa ilang mga saad.  Mora’g tinuod ang obserbasyon nga, “Lisod puhagon ang kartel sa bugas kon ang gitahasan sa pagpuhag, kauban ra usab sa kartel.  Madahaan!

Bentaha ang kwartahan

Segun sa pagtuon nga gipahigayon sa AIA Philippines, usa ka insurance firm, dul-an sa 60 porsyento sa mga Pilipino ang mi-ingon nga ang ka-walay kwarta nga maoy nag-unang  hinungdan sa stress nga makaapekto sa kinatibuk-ang pisikal ug mental nga panglawas.  Dili malalis kining maong kasayoran.  Sagad kanato, magluya kon walay sulod ang pitaka.  Mao kana’y giingon sa usa ka sikat nga dramatorgo nga, “Ang dato ug pobre parehas ra apan bentaha gyud kon aduna kay kwarta. Gani ang mga panakit sa kalawasan, mahanaw man kon sa kwarta mahampolan.”  Pagkatoytoy!