Mosukol gani ang omang

Matud pa ni Palace Press Officer Claire Castro, ang pagpanaway ni Presidente Marcos, Jr. ug ang pagpadayag sa iyang sentimyento batok sa kanhi Duterte administration nagpakita nga dili siya usa ka huyang nga pagka-lider sukwahi sa gipamulong ni kanhi Presidente Duterte kinsa miingon usab nga wala siya mo-bilib sa liderato ni Marcos, Jr.  Dili kaayo nako makonektar ang relasyon tali sa pagpanaway ni Marcos ug sa pagpangangkon nga lig-on siya nga lider.  Tingale buot lang ipakita sa presidente nga maantigo usab siya nga mosukol. Mao kana’y giingon nga “Mosukol man gani ang binugha ug ang omang, ang tawo pa kaha.”  Madahaan!

Namahayag ang Chairman sa Pagcor nga si Al Tengco nga aduna sila’y nabatyagan nga kompetisyon sa gaming industry operations sa Asia, labi na sa Japan ug Thailand.  Nasayran nga naglaraw ang maong mga nasud nga mag-operate usab sa ilang kaugalingon’g mga pasugalan o casino.  Dako tinuod kini nga hagit sa Pagcor labi na sa pagkabig sa mga sugarol nga turista.  Apan dili angay igsapayan kay ginaingon man bitaw nga “kon wala’y kompetisyon, wala’y asenso.”  Busa angayan’g tamdan sa Pagcor ang panutihon nga, “Inay mo-focus sa competition, angayan nga hatagan og igong pagtagad ang customer.”  Muleeng!

Andam ang Malacanang nga motuman kon unsay luwatan nga kamanduan ang Korte Suprema kabahin sa isyu sa zero subsidy sa PhilHealth karon tuiga, lakip na ang posibleng pag-uli sa pundo nga orihinal nga gitagana sa maong ahensiya.  Daghan’g sektor ang nahingawa sa zero subsidy sa Philhealth kay gituohan nga maka-apekto kini sa kapasidad sa ahensya pag-implementar sa mga benepisyo alang sa katawhan.  Makapikon kining maong baruganan sa Malacanang.  Ibalik ra man diay ang pundo kon manduan, ngano’ng gi-athan man gyud og hilabot.  Matud pa sa akong apohan, “Ang ka-kiriwaaan na man lang gyud.” Fezteleern!

Adunay bag-ong mga pangalan sa bagyo ang ipa-ila ug ihulip sa PAGASA human nila i-decomission ang daan nga walo ka pangalan sa bagyo sa ilang listahan.  Segun sa lagda sa PAGASA, i-decommission o taktakon sa talaan ang pangalan sa bagyo kon miresulta kini sa kamatayon sa dili mo-menus 300 ka tawo o ba kaha nakahimo kini’g kadaut sa mga kabtangan, agrikultura o inprastruktura nga mokabat og P1 ka billion ka pesos.  Maayo tingale nga i-apply kini’ng maong lagda ngadto sa mga opisyal sa kagamhanan nga nakahimo’g dakong kadaut sa nasud ug sa katawhan tungod sa naghinobra’ng pagpangawkaw.  Kon mahitabo, malampurnas gyud ang kadaghanan kanila nga daw naagian sa makusog nga bagyo.  Hinaut pa unta!

Sa ulahing survey nga gipahigayon sa Social Weather Station (SWS), nasuta nga dili diay apil sa talaan sa mga gikabalak-an nga isyu sa mga botante ang impeachment trial ni Bise Presidente Sara Duterte sa pagpili sa ilang kandidato karong umaabot nga eleksyon.  Gani, kina-iwitan kini  nga isyu nga gikonsiderar sa mga botante.  Maingon nato nga aduna na’y naumol nga opinion ang katawhan kabahin sa hinungdan sa pagtuboy sa impeachment.  Morag naunay man sa tari ang nagpasiugda sa maong impeachment.  Mao kana’y giingon sa pagya-komedya nga, “the foolishness of a man, go home to his body.”  Pagkatoytoy!