Tips kung may sore throat

ANG masakit at nangangating lalamunan (sore throat) ay palatandaan na ikaw ay magkakaroon ng sipon o trangkaso. Karamihan sa sore throat ay hindi naman nakapipin­sala at kusang nawawala sa loob ng lima hanggang pitong araw. Maaaring bumili ng mga over-the-counter na gamot sa ubo para ito ay gumaling.

Maraming dahilan kung bakit nagkakaroon ng sore throat. Kadalasan ay nagmumula ito sa impeksyon mula sa virus o bacteria. Kapag virus ang dahilan, puwedeng hindi muna uminom ng antibiotics.

Ngunit kung namamaga ang tonsils at may mga puti-puti na nakikita sa lalamunan, ang ibig sabihin ay may bacteria ito at kailangan nang uminom ng antibiotics.

Ang mga viruses at bacteria ay maaaring pumasok sa iyong bibig o ilong sa pamamagitan ng paglanghap ng particles mula sa pag-ubo o paghatsing ng ibang tao.

Paggamit ng kutsara, tinidor, towel, laruan, doorknob, computer keyboard at telepono ng isang may sore throat.

Maaari ring magdulot ng sore throat ang hyperacidity o pangangasim ng sikmura. Ang allergy ay puwede ring pagmulan ng sore throat.

Para mapabilis ang paggaling ng sore throat, narito ang mga nararapat gawin:

1. Magmumog ng maligamgam na tubig na may asin. Maglagay ng 1 kutsaritang asin sa isang basong maligam­gam na tubig at haluin ito. Gamitin ito para mag-mumog ng ilang segundo. Mababawasan ng tubig na may asin ang pamamaga ng tonsils. Makatutulong ito para guminhawa ang lalamunan at maalis ang plema.

Magmumog ng apat na beses maghapon.

2. Uminom nang maraming tubig, tsa-a o sabaw. Uminom ng walong basong tubig sa maghapon para lumabnaw ang plema at madaling ilabas. Iwasan ang kape at alak.

3. Subukan ang chicken soup o nilagang manok. Ayon sa mga ginawang pag-aaral at pagsusuri ni Dr. Stephen Rennard ng University of Nebraska, ang chicken soup ay tumutulong sa pag-alis ng pagbabara dulot ng sipon at plema. Pinipigilan nito ang pamamaga ng tonsils at paggawa ng plema. Ang chicken soup ay may sangkap na amino acid, ang cysteine, na lalabas sa pagluto ng sabaw ng manok. Ang cysteine ay nagpapalabnaw ng plema sa ating baga at pinapabilis ang ating paggaling. Ang manok ay mataas din sa protina.

4. Kung masakit ang lalamunan, puwedeng gumamit ng throat lozenges. Ito yung mga candy na nakagiginhawa sa lalamunan.

5. Ipahinga ang boses. Kung naapektuhan ng sore throat ang iyong pagsasalita ay maaaring humantong sa iritasyon at pansamantalang pagkawala ng boses.

6. Ang pagdagdag sa moisture ng hangin ay makatutulong na maging basa ang sinus at mucous membrane. May humidifier na nabibili o pwede din ang steam inhalation.

7. Iwasan ang usok at polusyon. Ang usok ay nagpapa-irita sa sore throat. Itigil rin ang paninigarilyo.

8. Madalas na maghugas ng kamay o gumamit ng alcohol na panlinis ng kamay kung may sipon at trangkaso.

9. Iwasan ang paghawak sa ilong at bibig para maiwasan makakuha ng mikrobyo.

10.Kumunsulta agad sa doktor kung hirap o masakit lumunok o huminga, paninigas ng leeg, sobrang pananakit ng ulo, mataas na lagnat, rashes, at paulit-ulit na pamamalat.