Sirkus sa Senado

Anaa na sa Senado ang impeachment complaint nga gipasaka sa Ubos Balay Balauranan batok kang Bise Presidente Sara Duterte. Ug makapaabot unya kita og dakong showdown ini’g hearing na unya niini pipila ka bulan gikan karon. 

Ang impeachment complaint, nga gi-transmit ngadto sa Senado kaniadtong Pebrero 5, 2025, naglakip sa mga akusasyon mahitungod sa giingong violation sa Konstitusyon, pagbaliwala sa public trust, graft ug corruption.

Ang mga akusasyon batok ni Duterte naglambigit usab sa giingong seryosong death threats nga gibungat kuno sa bise president batok kang Presidente Ferdinand Marcos Jr., First Lady Liza Araneta-Marcos, ug Speaker Martin Romualdez.

Hinuon, matud pa sa pangulo sa Senado, sa Hunyo pa magsugod ang impeachment trial sa Senado, takdo usab ini’g human na sa midterm elections sa Mayo. Kini tungod kay naka-adjourned pa ang mga senador karong panahona.  

Tungod sa ka alegre unya niining maong sirkus sa Senado, milyones na usab ang magtutok unya sa ilang mga telebisyon aron pagsaksi sa impeachment trial nga gikalambigitan sa bise presidente sa unang higayon. 

Dili na nato ikatingala pa nga kitang mga Pilipino mga ungo kung politika na gani ang hisgotan. Sukad pa kaniadto, nahimo nang palipas oras ang atong pagka-marites sa politika, ma lokal man o nasyonal nga isyu.   

Sa laing bahin, dili na usab nato bag-o ang mga impeachment trial sa Senado.

Gani nakasaksi na kita sa init nga mga debate niadtong mga Senate impeachment hearing ni kanhi presidente Joseph Estrada ug uban pang opisyal sa kagamhanan.

Ug niining panahona, atong ipanghinaut nga ang legal nga pamaagi maoy magpatigbabaw atol unya sa Senate trial.

Kinahanglan nga dili gayud i-shortcut ang proseso aron sa ingon nga atong mapakita sa tibuok kalibotan nga ang Pilipinas anaa pa gihapon nagsubay sa dalan sa demokrasya.