Balaod wala na gisunod

Niining linaktod nga pagdakop ni kanhi Presidente Rodrigo Roa Duterte (PRRD), diin kon may krimen man siyang nahimo, imbes ang atong kaugalingong korte sa Pilipinas maoy mangunay sa paghusay, gisuportahan hinuon sa administrasiyong Marcos pinaagi sa paggamit sa atong kaugalingong kapolisan, ang Interpol, kinsa ubos sa paggiya-pagpangulo sa abusadong Heneral Nicolas Deloso Torre III, kinsa walay g’yuy gibitbit nga warrant of arrest dihang nangayo niini si PRRD, mihilak sa labihang kapungot ang milyonmilyong good-governance, diehard Duterte supporters, kinsa nagpaninggit nag People’s Power tungod ning maong garapalan nilang pagdaogdaog.

Si PRRD tigulang na, hinay nang molakaw, timaang may seryosong sakit. Diin, pagkaugma unta sa maong adlaw nga siya giaresto, nakaskedyul nang dad-on siya sa ospital para pagpatsek-ap, nagpabiling buta-bungol si Torre ug iyang gingsakopan, bisan pa sa mga pakiluoy’ng-hangyo ni Senador Bong Go, mag-inang Honeylet-Kitty Duterte ug sa doktor ni PRRD.

Ultimo si Bise Presidente Sara ‘Inday’ Z. Duterte, Senador Go ug mga abogado ni PRRD wala gyod pasudla sa tinakpan-puthaw’ng gate nga hugot gibantayan sa kapolisan.

Si Inday, kinsa gustong makita personal iyang amahan aron maistorya-magakos ug mahagkan niining talandugong gutlo sa ilang kinabuhi, wala gyod nila tugoti.

Ambot, nganong wala na sila makaila niining ikaduha-kinatas-ang lider sa Pilipinas nga nagpangga kanatong tanang katawhan? Dili ba, maayo man ganing ubanan-ihatod siya?

May manlalabang neutral, kinsa misuway sa pag-abli sa ICC window, pinaagi sa internet aron masubay kon naka-release ba gayod kinig warrant of arrest sa maong adlaw, Marso 11, 2025 para dakpon si PRRD, pero walay Duterte sa mga ngalang naisyuhan.

Unya, matud sab ni Kitty ug Inday, na-state kidnap g’yod ilang amahan, kinsa gisakay sa usa ka private jet plane paingon sa Hague, Netherlands, ang balwarte sa ICC, bisan wala na kini hurisdiksiyon sa Pilipinas sanglit 2019 dili na man kita miyembro.

Basta, mga abogado ni PRRD mipadayag, illegal ang maong pag-arestong gihimo sa kapolisan. Tiaw bay, bisan usa kanila, wala gyod pasudla aron makapangutana-makadepensa-makasusi kon nahisubay ba sa balaod ang gibuhat sa mga mananakop?

Pastilan, kon si PRRD, kinsa ligdong-dalayegon-buotang lider ug suheto kaayo sa balaod, gisayonsayon ra nilag panamastamas, unsa na kaha kitang mga ultimo lamang?

Unya, okay ra ka, Bay?