Obligado ang anak nga mosuporta sa ginikanan

Dear Atty. Divine,

Ang akong iyaan nasakit ug naa hospital karon. Ang iyang duha ka anak nga pulos na minyo, ang usa atoa magtrabaho sa Manila samtang ang usa seaman. Kay ako may nagpuyo duol sa akong iyaan so ako ang mitabang kaniya ug midala sa hospital. Pagkakaron nagkaproblema ko sa iyang maintenance sa tambal kay ang iyang mga  anak mipasalig nga maoy mobayad sa hospital, apan wa na daw silay budget para ipamalit og tambal sa ilang inahan. Naluoy ko sa akong iyaan, unsa may angayan nako nga buhaton? Makapugos ba ang akong iyaan sa pagpangayo og financial support sa iyang mga anak alang sa iyang tambal? Daghang salamat. -- Norma

Dear Norma,

Basi sa atong balaod, ang mga anak, obligado sa pagsuporta sa ilang ginikanan. Kana maoy nalatid sa Article 195 sa atong Family Code (par. 3) nga nagkanayon nga ang mga ginikanan og mga anak obligado sa pagsuporta sa usa’g usa. Basi sa balaod, kon duha o tulo ka mga anak ang obligado sa pagsuporta sa ginikanan then dapat ilang bahinon depende sa ilang resources ug kun pilay panginahanglan sa ilang ginikanan matag buwan. Ang maayo nimong buhaton mao ang pagpahibawo sa iyang mga anak sa panginahanglan sa imong iyaan. Kun dili gihapon sila mohatag og suporta alang sa iyang maintenance sa tambal mamahimong moduol mo og abogado og magpahimo mo og demand letter, kon di gihapon mosanong then mamahimong modangop sa korte ang imong iyaan aron ang korte na ang momando sa iyang mga anak sa paghatag og financial support sa ilang inahan. Kon aduna say properties ang imong iyaan, mamahimo sab kini niyang ibaligya og ang halin niini maoy iyang gamiton alang sa iyang maintenance sa tambal. Thank you and God Bless!

Atty. Divine

Alang sa inyong pangutana, palihug lang sa email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.