EDITORYAL— Preparasyon sa Sinulog

Nagkamulo na tanan sa preparasyon sa umaabot nga Pista Senyor ug Sinulog 2025 aron makapresentar og maayong salida ug kaluwasan sa tanan atol sa selebrasyon.

Daghan ng mga banderitas ang gipangsab-it sa mga kadalanan samtang nagdahunog ang mga tukar sa Sinulog sa mga department stores, malls ug bisan gani sa mga tindahan.

Makita na sab karon diha sa mga kabarangayan ug mga kalungsoran ang mga contingents nga mosalmot sa grand parade.

Labaw sa tanan, nagpunsisok na ang mga debotos sa Senyor Sto. Niño diha sa basilica alang sa pagtuman sa ilang mga panaad.

Sama sa Pasko ug sa Bag-ong Tuig busy sab ang kapolisan ug mga security forces sa Sugbu para sa seguridad sa mga dumuduong ug sa mga Sugbuanon.

Lakip sa mga nangandam ang mga nagkadaiyang ahensiya sa gobiyerno nga segurado nga maapektahan sa mga kalihokan.

Hinuon, walay trabaho sa Sabado ug Domingo nga maoy pinakadaghan og mga kalihokan dinhi sa Cebu City mao nga sigurado gyung daghang mga tawo nga modasa aron motan-aw ug mosimba.

Ang mga giandam nga mga relihiyosong kalihokan nga dagsaon og mga deboto mao ang Penitential Walk with Jesus, Walk with Mary, Traslacion, Fluvial Procession ug Unang Bunyag ug Misa.

Ini og adlaw nga Domingo, Enero 19, mao na ang kulminasyon sa tanang pagpangandam nga gihimo pinaagi sa Sinulog Festival nga pagasugdan og Santos nga Misa.

Daghan ang naghinam-hinam niini kay ibalik na sa karaang venue ang Sinulog apil na sab ang pagpahigayon sa Grand Parade diin mahitabo ang street dancing sa gibanabanang lapas 40 ka mga contingents.

Sa pagpangandam nga gihimo, buhaton sab unta sa publiko ang ilang kaakohan alang sa hapsay ug luwas nga selebrasyon pinaagi sa pagsunod sa mga lagda ug dili magpasayun-sayon nga mabiktima sa mga badlungon.