Nakubit sa kaugalingong taga
Lisod sabton ang kahilom sa mga Duterte sa nagpadayong pagpanghasi sa China sa atong mga mangingisda ug kasundalohan sa West Philippine Sea ug sa bangis nga mga krimen nga nahimo sa ilang gi-lisensiyahan nga gatosan ka mga Philippine Offshore Gaming Operators (POGOs).
Mas lisod tugkaron ang abtik nilang mga pagpanaway ug pagpanghudlat–uban ang bantang nga pasumbingay nga mapalihok bisan unsang orasa ang minilyon nila ka mga dumadapig–kon mahulga nang interes sa ilang pamilya ug labing suod nga mga higala. Bisan sa dugay nang pinangita sa balaod nga si Apollo Quiboloy.
* * *
Katungod sa mga Duterte ang pagpahinumdom sa administrasyon ni Presidente Ferdinand Marcos Jr. nga mahimong sobra rang pagpakatap ug pag-okupar sa kaliboan ka polis sa 30 ka ektarya nga compound sa Kingdom of Jesus Christ (KOJC) nga gidudahang gitagoan ni Quiboloy (bahala na kon mas lapad nga pagpangyatak sa mga tawhanong katungod ang nahimo sa laktod nga pinatyanay sa ilang drug war).
Pero nataligam-an sa mga Duterte nga ila sang katungdanan ang pag-awhag ni Quiboloy pagtahan sa kapolisan ug pag-atubang sa gipasangil nga bangis nga mga krimen batok niya.
* * *
Dili kini nila angkunon, pero labing gikahadlokan sa mga Duterte mao nga ang pagpakita sa braso sa gobiyerno pagdakop ni Quiboloy mensahe para nila: Dili managana ang Malakanyang paggamit og mas dakong puwersa aron pagsegurong mapatuman ang gipaabot nga warrant of arrest sa International Criminal Court (ICC) batok ni kanhi Presidente Rodrigo Duterte.
Labaw sa pagdupa ni Quiboloy, gisukod nang daan sa mga Duterte unsay dag-anan inig abot sa ilang kaugalingong adlaw sa panudya.
* * *
Nakakitang mga eskperto og daghang sayop sa librong ‘Isang Kaibigan’ ni Bise Presidente Sara Duterte Carpio. Para namong wala kasuwat og libro, walay makalabaw sa mosunod niyang mga sipyat:
Si Kuwago ang sad-an nga nagguba sa bagyo ang iyang salag kay iyang gihimo sa sanga sa mangga imbes sa mas luwas nga gipili sa iyang katiguwangan sa lungag sa punoan (morag nagpatuong lider sa relihiyon nga imbes motabang sa mga sakop nanglugos ug nanguwarta hinuon nila); ug
Si Kuwago ang sad-an nga gibiyaan sa higalang mga langgam kay giunay niya og kaon ang pipila nila (morag politikong nitukob sa tanang confidential funds).
* * *
- Latest
