Dili tanan mosulod sa simbahan buotan duna usay mga dautan

Wala gyuy pili ang mga tampalasan nga mga kawatan bisan sa sulod sa simbahan namiktima diin nakuhaan pa gyud sa CCTV ang gihimo nilang krimen. Usa ka babaye nga nanagkot og kandila uban ang iyang anak ug samtang nangalyupo siya niabot usab ang grupo sa mga kawatan nga mialirong kaniya.

Ang uban nagpakarong-ingnon nga nananagkot samtang ang usa ka babaye migamit og panapton nga gitabon sa iyang kamot nga maoy gikuot sa bag samtang ang usa ka babaye ang nitabang usab og tabon aron dili mabantayan ang ilang gihimo.

Dali ra kaayo nila gihimo ang krimen, dihang nakuha na ang cellphone sa sulod sa bag nag-iyahay na sila sa pagpanglakaw ug dali kaayo nga nakagawas sa simbahan. Nahitabo kini niadtong nakalabay’ng adlaw sa dagkotanan sa Basilica del Sto. Niño diin kompiyansa ra usab kaayo ang biktima kay abi niya og buotan ang iyang mga katapad nga mga tawo, apan mga yawa man diay.

Atol sa akong pagpakig-estorya sa media liaison sa Basilica nga si Fr. Jules Van Villa Almerez, siya miinong nga lisod hukman ang mga tawo nga mosulod sa simbahan kay dili maseguro nga kini mga kawatan kay maayo man usab manamit nga mora’g regular nga manimbahay ug kong dili maaktohan nga makahimo og sala nganong pugngan man sa pagsulod. Sakto si Father Jules hinungdan nga awhag niini sa mga manimbahay nga magmatngon ug dili mokompyansa aron dili gyud intawon mabiktima.

Nahinumdum ko sa usa ka wali sa pari kaniadto nga nagkanayon nga ang yawa wala sa mga dapit kahilayan apan naa kini magpundo sa simbahan kay diha man sila manintal og bag-ong sakop tungod kay kong itandi sa balay kahilayan sure naman nga ila na kining ma-recruit.

Bitaw kining mga kawatan nailhan na sa kapolisan base usab sa CCTV nga kuha sa sulod sa simbahan. Napasakaan na gani sila og kaso dili lang sa pagpangawat kon dili kaso sa illegal nga drugas nagpasabot nga nakatilaw na kini sila og bilanggoan, nganong nakagawas pa man ug nagpadayon sa ilang pagkadautan.

Kini tungod kay kong madakpan sila igo ra man makapiyansa ug makagawas, dayon ang mga biktima dili naman mopasaka og kaso kay hasolan maong mogara kining mga hinampak nga kawatan magpadayon sa ilang panginabuhi pinaagi sa pagpanguha sa kabtangan sa uban. Dili gyud kakompyansahan ang mga tawo nga atong ikatapad, kong adunay mga tawo nga mokalit og duol likay na dayon kay segurado mao na kini sila ang mobiktima kaninyo.

Komon kini nga panghitabo ilabi na karon nga nagsingabot na ang Pasko nga mao usay igara nila, dili lang mga kawatan nga taga Sugbo kon dili aduna pay mga kawatan nga gikan sa ubang dapit ang magrakit dinhi sa dakbayan sa Sugbo ug mga silingang syudad kay tibatiba man sila dinhi busa. Kinahanglan mag-igmat ma simbahan man o dili mag amping gyud aron dili masilisihan.

Kong dili pa lang sala kaayo gyung putlan og kamot kining mga tawhana aron dili na makapamiktima pa.