EDITORYAL - Di tanang mosud sa simbahan mosimba

Dili gyud tanang mosud og simbahan ang tuyo mao ang pagpaduol sa Ginoo ug para sa ilang espirituhanong kaluwasan, kondili para hinuon sa paglaglag sa ilang kalag pinaagi sa pagpanglupig sa uban sama sa gibuhat aning unom ka tawo nga nag-viral sa social media.

Nagpakita lang nga wala na gyuy gipiling lugar ang mga kawatan, bisan asa kun makabinta kay bisan sa sud sa Basilica Minore del Sto. Niño wala gyud tahora ang Balaang Bata para mangawat.

Sa usa ka nag-viral nga video nga kuha sa CCTV camera sa sud dagkutanan og kandila sa maong simbahan, nakita ang modus operandi sa unom ka mga mangunguot nga nibiktima sa usa ka babayeng deboto nga nanagkot og kandila.

Ang biktima, seryuso sa iyang gibuhat sa pagpanagkot gani wala siya manumbaling sa mga tawong nipalibot kaniya ug nisabod samtang siyang nagdagkot og kandila.

Ang mga nisikit kaniya nga daw mga diyosnon nga nagkamulo og dagkot, mga tawo diay’ng adunay dautang tuyo.

Usa sa mga babayeng tambok nga kakunsabo sa grupo nga nakita sa video nga murag kilat mikuot sa bag sa biktima. Ug dali dali sab nga nitalikod ug nilakaw palayo sa grupo.

Kun unsa kapaspas ang grupo mialirong sa biktima, ingon niana sab sila kapaspas nga nagbuwag-buwag og biya sa ilang biktima nga niadtong tungora wala gyud makabantay nga nabiktima na diay siya ug gikuot ang iyang bag.

Kaning kalisod ug kakabus sa tawo maoy sagad ipangrason nga hinungdan nganong nabuhat o nakabuhat sila og dautan. Kini para sila makakaon o makalahutay kay wala sila mapahiyomi sa kapalaran.

Apan sobra ra pud tingali ug dili katuohan kun mao sab kini ang rason o pasumangil aning grupoha nganong ilaha kining gibuhat sa sud sa dagkotanan sa kandila sa Basilica Minore del Sto. Niño de Cebu.

Bisan tingali og dili Romano Katoliko, dili kini buhaton sa sud sa Basilica nga giisip sa tanan nga balaang lugar para sa tanan.

Hinuon naa nay ideya ang kapolisan kun si kinsa ang lima sa grupo, kun nailhan dayon sila sa kapolisan, nagpasabot nga kini bisyo na nila kining ilang modus operandi.