Nagduda sa QuadComm
Hangtod karon bilib pa ko sa buwag nga mga imbestigasyon sa mga kongresista sa extrajudicial killings ni kanhi Presidente Rodrigo Duterte (Quad Committee) ug kuwestiyonableng gasto sa P612.5 milyones nga confidential funds sa Office of the Vice President ug Department of Education (Blue Ribbon Committee).
Pero duna na koy pagduda. Nga ang imbestigasyon sa EJKs wala itumong paghatag og hustisya sa mga tagtungod sa mga biktima. Ug nga ang imbestigasyon sa mga anomaliya ni Bise Presidente Sara Duterte wala itumong sa pagbawi sa kuwarta ug pagpa-priso sa mga responsable.
* * *
Niang mga timaan nga nakapaduda nako sa ilang kamatinud-anon:
• Walay kongresista nga niawhag nga silotan ang kanhi presidente sa paghana og sumbag ni kanhi Senador Leila de Lima ug pagsuway paglabay sa mikropono ni kanhi Senador Antonio Trillanes (naluoy hinuon si Benny Abante sa katiguwang ni Duterte ug mas nabalaka si Ace Barbers nga gikapoy na og tubag sa mga pangutana);
• Human sa pila ka semanang pagsuway, wala pa mahatag ang mga supina sa mga opisyal sa OVP nga niiisnab sa imbestigasyon (bisan mahimo untang pakisayran sa OVP asa sila nag-official business ug suguon ang kapolisan pagdakop nila) ug bisan sa daghang hulga walay nakasohan;
* * *
• Gibuhian si Koronel Royina Garma bisan ilang girekomendar nga ikiha sa kamatayon ni Heneral Wesley Barayuga ug sa ilang nahibaw-an nga ilegal nga pagpadala ni Garma og dolyar ngadto sa Estados Unidos pinaagi sa iyang kanhi bana nga si Koronel Roland Vilela (walay niangkon nga nauwaw nga ang US government na hinuoy nitanggong ni Garma sa money laundering);
• Gibuhian si Koronel Edilberto Leonardo bisan wala mopirma og affidavit pagmatuod sa pasangil ni Garma sa iyang liderato pagpatuman sa Davao template sa EJKs ug reward system sa tibuok Pilipinas;
* * *
• Wala imbitaha pagbalik si kanhi Cebu City Mayor Tommy Osmeña nga maka-detalye unta sa terorismo sa Sugbo sa 2018 ug 2019 nga gipasangil batok nilang Garma ug Heneral Debold Sinas (kay gawas nga kontra partido maguba ang depensa ni Garma nga wala siyay labot sa EJKs); ug
• Wala pa madakpi si kanhi Presidential Spokesperson Harry Roque bisan kapin sa buwan nang nagtagu-tago ug nagsige og sibya sa social media.
* * *
- Latest
