Ahong imbistigahon sa DILG

Gipahibawo ni DILG Secretary Benhur Abalos nga di sab niya palabyon ang pagkadiskubre sa operasyon sa illegal nga POGO diha sa dakbayan sa Lapu-Lapu.

Sa interview ni Caecent Magsumbol, reporter sa The Freeman, gitug-an ni Abalos nga mag-atubang og imbistigasyon si Mayor Junard Chan lakip na ang hepe sa kapolisan sa Lapu-Lapu ug ang ubang mga ahensiya nga posibling nagpasagad sa katungdanan o ba kaha dunay kalambigitan sa illegal nga operasyon sa Pogo sud sa sa usa ka resort sa Barangay Agus.

Tan-awon sa DILG wa bay pagpasagad ang lokal nga mga opisyal sa Lapu-Lapu ug ang kapolisan hinungdan nga nakahimo sa ilang operasyon ang naasoy’ng pogo. Wala gyuy mga opisyal sa Lapu-Lapu ug bisan ang kapolisan nga dunay estasyon dili layo sa resort nga nakabantay sa operasyonsa illegal nga POGO.

Kun wa pay tulo ka mga Indonesian nga mga trabahante nga nakaeskapo ug nakapangayo og tabang sa ilang gobiyerno, dili mahibawo ang mga awtoridad sa Pilipinas. Gani ang mga sakop na sa Presidential Anti-Organized Crime Commission (PAOCC) nga nagbasi sa kaulohan, inabagan sa National Bureau of Investigation (NBI-7) ang mihimo sa pagpangronda.

Mas nisamot ang pagduda nga posibling protektado sa lokal nga mga opisyal sa Lapu-Lapu ang operasyon sa nahisgutang POGO human nadiskubrehan sa mga ahente sa NBI nga nagsilbing consultant sa buhatan sa mayor ang usa sa mga tag-iya sa POGO hub nga si Zhao Shouqui tungod sa ID nga nasakmit atol sa ronda.

Wala hinuon angkuna ni Chan nga iyang consultant si Zhao. Gihingusgan sab sa mayor nga peke ang ID nga nasakmit sa mga tinugyanan sa NBI.

Apan dili ikalimod ni Chan nga daghang higayon niyang gipasalamatan pinaagi sa social media ang mga tabang ni Zhao ngadto sa syudad. Mahiagom kaha si Chan sa gidangatan ni Bamban, Tarlac mayor Alice Guo nga natangtang gyud sa pwesto?

Lahi hinuon ang ilang sitwasyon tungod kay mas daghan ang mga ebidensiya nga nagtudlo ni Guo sa iyang direktang kalambigit sa operasyon sa Pogo didto sa iyang dapit. Sa sitwasyon ni Chan, gawas sa ID nga iyang gihulagway nga peke ug sa mga social media post nga nagpakita sa iyang koneksiyon sa giingong operator sa POGO hub nga si Zhao, wala nay laing mga ebidensiya nga direktang maglambigit niya sa kalihokan.

Ambot kaha og duna bay makit-an ang mga imbestigador unya nga mohimo sa pakisusi sigun sa mando ni Abalos. Apan niining nag-angat  ang piniliay dili makatabang ni Ahong ang himoong imbistigasyon sa DILG.