Kumoton hangtod mapusgay

Nanawagan ang liderato sa Kamara kang kanhi Presidente Rodrigo Duterte ug sa iyang mga kaalyado nga pamatud-an nila nga komedya lang ang pamahayag sa kanhi presidente nga ipapatay niya ang mga drug personalities.  Mora’g gisugdan na pag-ipit sa mga galamay sa administrasyon ang pamilyang Duterte. Makapahinumdum kini sa tambag sa akong amigo nga, “Kon buot ka molahutay sa pamolitika, kinahanglan nga kon makuptan mo na gani ang ‘lisik’ sa imong kaaway, ayaw na kini buhii, hinonoa, kumota kini sa makusog hangtod nga mapusgay kini.” Madahaan!

Malatosan gyud

Gisita og contempt ug gimando nga madetiner sulod sa 24 oras ang kanhi tigpamaba ni Presidente Duterte nga si Harry Roque tungod sa pagpamakak niini sa hinungdan ngano nga wala siya makatambong sa una’ng pagdungog sa quad committee sa kongreso.  Gipatawag si Roque sa maong imbestigasyon tungod sa iyang kalambigitan sa POGO.  Dayag ang paglaban ni Roque sa kanhi presidente kon adunay mga isyu nga ipahid sa naulahi.  Mora’g adunay punto ang panahom sa akong amigo nga, “Ingon bitaw ko, naghinay-hinay na sila’g ipit sa mga Duterte ug sa iyang mga kaalyado.  Ang dili molinya, malatosan gyud.”  Fezteleern!

Maayo pa ang hayop

Nanawagan si Presidente Marcos sa mga lokal nga liderato nga magpabilin silang angayan sa pagsalig sa katawhan ug nga maningkamot sila nga mahimo’ng epektibo nga  mga mayordomo (steward) aron mapalambo ang ilang lugar nga gidumala.  Balik-balik na ang maong panawagan sa matag presidente apan padayon man lang gihapon ang kakabos sa atong mga lokal nga kagamhanan.   Haum ang panultihon nga “Mas maayo pa ang hayop kay sa tawo, kay ang hayop dili gayod motugot nga ang mangulo sa ilang panon mao kadto’ng huyang ug bulokon.”  Muleeng!

‘Taryo mo diha

Gihatagan og laing kahigayonan ni Cebu City Executive Judge Marlon Jay Moneva nga makapraktis sa ilang notarial commission kadtong mga abogado/notaryo publiko human madiskobrehi ang ilang mga kalapasan.  Usa sa gitumbok nga kalapasan mao ang pag-gamit og mga barkers kinsa makapahinumdum kanato sa namaligya’g ampao ug chicharron sa Carcar.  Seryoso ang maong mga kalapasan.  Kon dili gyud sila mag-usab, basin ang korte na unya ang mo-notaryo sa dokumento nga nagtangtang kanila sa talaan sa mga abogado ug basin sila na unya ang mangunay pag-canvass nga “Taryo mo diha.” Pagkatoytoy!

Mainampingon nga pasumbingay

Mihukom si Acting Mayor Raymond Alvin Garcia nga ang Sinulog Festival sa tuig 2025 ipahigayon na pagbalik diha sa Cebu City Sports Center.  Alang kang Garcia, kinahanglan nga planohon na daan ang maong kalihokan, total mahimo ra man’g usbon ni Mayor Rama ang iyang desisyon inig balik niya.  Mainampingon ang mga pulong ni Acting Mayor Garcia apan daw nagpasumbingay usab kini og lain nga kahulogan.  Gikahibudngan kini sa uban kay alang kanila, walay pulos ang mga plano kon nasayod ka nga kini paga-usbon ra diay.  Pinugngan ang gininhawa sa katawhan nga nagpaabot sa lintunganay niining tanan.  Abangaan!