EDITORYAL - “Heads will roll.” Matinuod kaha?

Asa ang hustisya dinhi dapita? Maayo lang mogukod ug mopiit sa mga kabus nga nakalapas og gagmay’ng salaod, apan sa mga dagko ug mga gamhanan gani bisan bug-at kaayo og kaso yano ra mang makaikyas.

Mao ni ang sentimiyento sa katawhan may labot aning report nga nakaikyas na gawas sa Pilipinas ang pinangita karon nga si Alice Guo. Si Guo mao ang gisuspensong Bamban Mayor sa Tarlac nga ang tinuod pangalan mao si Guo Hua Ping, usa ka Chinese national nga gidudahang espiya sa China.

Kung ang abogado ni Guo miinsister nga 100 porsiyentong dia pa sa nasud ang iyang kliyente, apan nganong wala naman gyud siya mopakita sa mga gipatawag nga hearing sa Senado bahin sa operasyon sa Philippine Overseas Gaming Operation (POGO) nga diin siya gilambigit, wala

Nakapasamot ang pagdudang tinuod ang impormasyong nadawat ni Senador Riza Hontiveros nga nakalusot gyud padung sa Malaysia si Guo kay ang iyang igsuong Sheila Leal Guo ug Katherine Cassandra Li Ong, ang authorized representative sa  POGO nga gironda sa Porac, Pampanga, na-intercept man sa immigration officials sa Indonesia.

Karon, maayong hagiton si Presidente Ferdinand Marcos Jr. kun kaya ba niyang tinud-on ang iyang bahad nga “heads will roll” aning pageskapo sa Pilipinas ni Guo.

Gihimo lang  karong kataw-anan sa mga nagpaluyo niining tanan ang hustisya, ang balaod, ang gobiyerno sa Pilipinas ug labaw sa tanan ang mga Pilipino.

Gipakita nila nga kaya nilang manipulahon ang tanan nga dili sila maglisod gamit ang mga teknikalidad ug pagbawog sa balaod.

Kaning mga naghimo niini, siguradong dugay na niining trabahoa ug posible gyud nga duna silay sinaligan nga naa sa posisyon sa gobiyerno o ba kaha mga kawani gyud sila sa gobiyerno.

Nagpasabot sab kini nga kinahanglang dunay buhatong lapad nga kausaban sa kasamtangang sistema sa imigrasyon, seguridad, justice system sa nasud aron dili kini abusaron ilabi na sa mga naa sa mga kurakot nga kawani sa gobiyerno.