EDITORYAL — Nikulit og bag-ong kasaysayan

Nabaniog kaayo sa Pilipinas ang nahatag nga dakong dungog sa mga atletang nisalmot sa Paris Olympics nga nakabitbit og medalya, ilabi na ang sikat na kaayo karong si Carlos Yulo nga nakadala og duha ka bulawang medalya sa gymnastics.

Napun-an pa gyud kini og dugang duha ka medalyang bronze gikan sa boksing pinaagi nilang Nesthy Petecio ug Aira Villegas.

Base sa medal rankings kagahapon adlaw nga Sabado, ang Pilipinas naa sa ika-26 nga pwesto ug maoy nanguna sa tanang 11 ka miyembro sa ASEAN nga nisalmot didto, sunod niini ang Indonesia nga nakakuha sab og duha ka gold ug usa ka bronze.

Grabe kadako ang kalipay ug pagdayeg nga nadawat ang mga atletang nakabitbit og medalya.

Apan dili dapat kalimtan ang sakripisyo sab sa uban pang mga Pinoy nga atletang naninguha apan napakyas paghatag og dungog sa Pilipinas didto.

Partikular niini silang Carlo Paalam, Eumir Marcial sa boksing ug si world no.2 EJ Obiena nga pulos tanan gipaabot unta nga makakuha og medalya.

Apan bisan paman niining tanan, ang mga medalyang nabibit sa tulo paigo na para makulit ang bag-ong kasaysayan sa Pilipinas diha sa Olympics sukad nga niapil kini sa maong kompetisyon niadtong 1924 diin usa ra ka atleta ang nagrepresentar sa nasud ug kini sa track and field lang.

Bag-o kining kasaysayan ug klaro kaayo ang dakong paglambo sa sports program sa nasud kun basihan ang nakalabay nga mga rekord sa Olympics, partikular sa kataposang 2021 Tokyo Olympics diin nakabibit ang nasud og tulo sab ka medalya, usa niini bulawan, duha ka silver ug usa ka bronze.

Dapat kining ikapasigarbo sa tanang Pilipino tungod kay napamatud-an niini nga bisan sa mga inilang mga nasud, aduna kini mga atletang kayang tupngan ug palabwan ang pinakalabing banggiitan nilang atleta.

Nagpasabot kini nga naa gyuy potensyal ang mga Pilipino sa sports, gani ang nakabitbit og medalya purong dugong Pilipino ug dili Fil-foreigners nga atleta.

Sa mga duwa nga wala magkinahanglan og height ug gidak-on sa panglawas pwede kaayong makaparang ang mga Pinoy.