Pag-ilog sa bulawan
Sakto si Tim Cone, head coach sa Gilas Pilipinas nga nakadaog sa atong labing unang gold medal sa men’s basketball sa Asian Games sukad sa 1962, sa pagkumpisal nga di katuohan ang mga oras, mga adlaw, mga semana ug mga tuig sa pakigbisog ni Carlos Yulo aron pagdaog sa 2024 Paris Olympics.
Sayop ang mga politiko nga paspas nga nikabayo sa kadaogan ni Yulo pinaagi sa mga pahalipay sa social media nga mas dagkong ilang mga nawong ug mga ngan nga mora hinuon og silay tinuod nga nakadaog sa bulawan.
* * *
Nga maoy ilang naandan. Sama sa pagpangilog og dili ilang kadaogan, nangangkon sab sa mga proyekto nga gigastohan sa dili ilang kuwarta. Gitilok ang tanang kredito sa way pagtug-an sa mga magbubuhis nga ang orihinal nga budget sa mga proyekto gikapnan sa makalilisang nilang mga komisyon.
Sama sa ilang pagsakay sa kadaogan ni Yulo, gipahimuslan sab nila ang kasayon sa paglipat sa mga botante sa ilang kapakyas sa pagsulbad sa mga problema sa edukasyon, kahimsog ug katimawa pinaagi sa pagpabaha sa fake news ug vote buying sa mga eleksiyon.
* * *
Gipamugos og plastar ang ilang dagway tapad ni Yulo bisan walay bisan usa nga motuo nga duna silay bisan gamay na lang nga tampo sa makasaysayanon nga kadaogan. Kay kinsa man ang makapugong nila?
Nahibawo sila nga nahibawo ang katawhan sa ilang pagpangawat sa buhis. Pero nagtuo nga pasagdan rang ilang binuang kon mamisik sa ilang kinawat. Masaligon nga way dag-anan ang mas ligdong ug mas takos nilang mga kaatbang nga dili kawatan ug busa walay kuwarta.
* * *
Mahimong nahibawo nga giluod ang kasagaran sa nakakita sa ilang posts nga nag-ulug-ulog ni Yulo. Pero unsaon ta man nga ganahan mang mosangyaw sa ilang mga ngalan. Bahalag walay motuo, mas matagbaw mang magbansiwag sa social media ang gi-retoke nilang mga letrato.
Sama katulibagbag ang pagpatuman sa mga proyekto. Walay pundo sa pagtukod og classrooms ug hospitals, pag-hire og dugang teachers ug healthcare workers, pagpamalit og tambal ug paghatag og ayuda sa mga mag-uuma, mga mangingisda ug labing kabos nga mga pamilya. Pero nag-awas ang kuwarta para sa mga proyekto nga dili igkita. Ug wala kinahanglana.
* * *
- Latest
