EDITORYAL - May tahas ang henerasyon karon

Ning sunod-sunod nga mga pagdahili sa yuta ug flashfloods, senyales na gyud kini nga kinahanglan na gyung atimanon sa tawo ang kabukiran sa palibot niini.

Ning bag-o, laing pagbaha na sab ang nasinati didto sa amihanang bahin sa Sugbu diin gatosan ka pamilya ang gikinahanlang ihiklin sa mas luwas nga lugar tungod nabutang sa peligro ang ilang kinabuhi.

Niini sab bulana, dunay pagbaha nga nakaapektar sa tulo ka barangay sa Mandaue mao nga gihiklin sab ang 300 ka pamilya.

Kaning pagkaupaw sa kabukiran human gipamutol ang nga dagkong kahoy didto ug kining kawalay klarong plano sa imprastraktura sa kapatagan nakatampo gyud sa problema aning pagbaha.

Kun dunay dagkong mga kahoy ang kabukiran, dili kini basta-basta magmugna og landslides kun mouwan kay makatabang ang mga ugat niini sa pagpugong sa yuta aron dili mahunlak paubos bisan og nahumod kini og maayo sa tubig uwan.

Gawas pa niana, makapundo sab og tubig ang mga kalasangan para sa mga sapa nga tinubdan sa tubig sa mga tawo, gawas nga abunda ang tubig, mobugnaw sab ang palibot ug himsog ang ecosystem sa usa ka lugar.

Apan ang mga kahoy karon sa kabukiran dili na sama kalig-on sa kaniadto 50 ka tuig na ang nakalabay. Ang mga punoan sa kahoy karon dili na sama sa kaguwang kay bag-ohay palang sab kining gipananom wala pay 30 ka tuig.

Kinahanglan nga karon palang, ibalik na unta sa mga lokal nga kagamhanan ang paghingusog ug dasigon ang mga tawo paghimo sa tanang matang sa tree planting activities sa ilang hurisdiksyon.

Dili para karon nga benepisyo kondili para kini sa sunod nga duha ngadto hangtud sa hangtud nga mga henerasyon sa mga tawo. Maayong anha kini sugdan sa tanang lokal nga mga eskuylahan.

Mahimo silang paangkunon og mga dapit nga maoy ilang magsilbing reforestration project  sa matag eskuylahan. Kinahanglang matag eskuylahan adunay kaugalingong luna nga maoy ilang palabungon ang mga pananom nga kahoy.

Kay kining tanang kadaut ug negatibong epekto sa mga natural unta nga mga uwan, bagyo ug huwaw, mas nigrabe tungod sa pagpabaya sa atong mga katiguwangan.

Kun ang henerasyon karon magpabaya sab, mas grabe pa sa katalagman karon ang mahitabo sa sunod nga mga henerasyon.