Lisod sabton
Nipasabot si Bise Presidente Sara Duterte Carpio nga ang iyang pahibawo nga di siya motambong sa SONA ni Presidente Ferdinand Marcos Jr. karong Lunes di komedya ug di hulga. Nipadayag siya og kasubo nga daghan ang wa kasabot sa iyang sulti.
Nipuno siya nga ang wa kasabot sa iyang sulti wa magkinahanglan og katin-awan. Wa niya isulti pero ang implikasyon mao nga ang nakasabot sa iyang pahibawo labaw pang wa magkinahanglan og katin-awan. Sa laktod, nagduda ko nga hasta ang bise presidente wa kasabot unsay gusto niyang ipadangat nga mensahe.
* * *
Ang bise presidente gihulagway ni kanhi Presidente Rodrigo Duterte nga liwat niya. Sa unsa, wa niya klaroha. Igo lang nitambag nga di angayng tuohan ang tanang sulti sa anak. Sama sa pahibawo nga mag-senador siya uban sa duha ka anak nga lalaki nga silang Paolo ug Sebastian.
Mangahas ko og agpas nga ang gipasabot sa kanhi presidente mao nga ang bise presidente pareha niya nga, ambot tungod ba sa kakuwang sa bokabularyo o pailob, maglisod pagpasabot. Maong ang anak nanukmag og sheriff ug ang amahan nilusad og laktod nga pinatyanay.
* * *
Nagduda ko nga ang anak, sama sa amahan, ganahan nga mahisgutan. Sa bisan unsang rason. Kay wa na may nagtagad pagpangutana sa tinuod nga rason sa iyang resignasyon sa DepEd, ni-boluntaryo og kasayuran nga personal ang mga rason, kasagaran nanukad sa ilang gikasabotan ni Marcos Jr., pero nagsapaw-sapaw na sa kadaghan.
Ambot kon, sa kataposan, ganahan na ba siyang mopasabot. Pero ang mga sakop sa media di na interesado ug nagpasalamat na lang niya.
* **
Nahibudngan sa kadaghanan mao nga bisan sa kapakyas pagpasabot sa iyang mga lakang ug mga sulti, apil nang padayon nga pagpakahilom sa bastos nga panghasi sa China sa West Philippine Sea ug makauuwaw nga pagdupa ni Apollo Quiboloy nga gipasanginlang nanglugos sa kabataan ug kababayen-an, nisaka hinuon ang ratings sa bise presidente sa kataposang survey sa Pulse Asia.
Tugoting motanyag og tinamban nga hubad: Nihangop ang iyang mga dumadapig sa kalibog sa nasud sa iyang bag-ong mga lakang ug sulti, kay nagmatuod nga hastang mga politiko, mga negosyante ug mga sakop sa media way kalainan nila, nga naglisod sab pagsabot niya.
* * *
- Latest
