Palpak sa LTO

Ngano gyud kaha nga ang kadagkoan sa Land Transportation Office (LTO) dili man magtagana daan og daghang plate numbers nga nakahibawo man unta sila nga kada tuig duna gyuy dugang mga sakyanan nga iparehistro?

Mga utokan ang mga tawo nga gitudlo pagdumala sa LTO, kay gani daghan kanila mga abogado, ug mga tawo nga sa kadugay na nilang nadestino sa LTO, suhito na unta kaayo sila unsay angay’ng himoon aron malikayan ang problema.

Pero dinhing bahina naka-lookdown ko sa kadagkoan sa LTO nga pwerteng dugaya na niining problema sa kanihit sa mga plate numbers, ug wa gyud nila kini mahatagi og kasulbaran.

Kada tuig, mag-anam og usbaw ang gidaghanon sa mga sakyanan nga marehistro sa LTO, ug kon napangandaman pa nila kini daan, ini'g parehistro makahatag unta dayon sila og mga bag-ong plate numbers.

Makauuwaw kaayo nga dugay na kining problemaha apan wa gyud sila makapangita’g paagi? Sa tuig 2022, dinhi lang sa Region 7 (Central Visayas) dunay 865,213 ka sakyanan nga girehistro. Karong tuiga, miabot na og 942,536 ang narehistro.

Sayonan ka nga karong tuiga nadugangan og 77,323 ka bag-ong sakyanan nga girehistro, ug kadaghanan niini wa mahatagi og plaka sa LTO? Unya karon, lisud-lisuron nila ang mga tag-iya og sakyanan kay manakop na kuno sila sa mga way plaka?

Kon nagtarong pa sila sa ilang mga serbisyo, ini'g rehistro nila sa mga bag-ong sakyanan, diha-diha unta dayon makahatag na sila og mga bag-ong plaka.

Ang rumbo nako sa akong mga pagsaway mao ang mga regional director sa LTO, ug way labot ang mga anaa ra sa gagmay’ng katungdanan kay igo ra man sila nga mosunod sa kamandoan gikan sa ibabaw.

Ang mga regional director sa LTO duna man sila’y miting uban sa kadagkoan sa LTO, siyaro og wa gyuy nakasugyot nga mag-imprinta sila daan og daghang plaka nga ihatag, aron gamiton sa sunod tuig?

Dinhi lang sa Region 7, ang LTO mikolekta og P1,630,586,649 (P1.6 Billion kapin), nga mas dako og P149 milyones kay sa koleksyon sa 2022 nga kapin lang sa P1.4 Billion.

Ingon usab niini ang sitwasyon sa ubang mga LTO regional offices. Sa kadaku sa kwarta nga ilang nakolekta, nganong dili man sila makapahimo daan og mga plaka?

Ang rason ba kay ang mga dagko sa Department of Transportation (DOTr) maglalis pa kon kinsa nga kontraktor ang ikontrata aron sila makakuha og dagkong komisyon?

Lauman nako nga si LTO Chief Vigor Mendoza II mangita gyud og paagi pagsulbad sa problema. Karon, gihatagan nila og problema ang mga motorista.

Ang kadagkoan ra ba sa LTO dinhi sa Region 7, dili sayon nga pakighinabian sa media aron unta mahatagan og tukma nga kasayoran ang mga magbubuhis.